O CD Lugo achega o fútbol ás aulas co programa “CD Lugo na Escola” no CPR Plurilingüe Cervantes
O Club Deportivo Lugo continúa reforzando a súa presenza na comunidade educativa a través do programa “CD Lugo na Escola”, unha iniciativa impulsada en colaboración coa Vicepresidencia da Deputación de Lugo co obxectivo de achegar a entidade aos centros educativos da provincia e fomentar o sentimento albivermello entre a mocidade.
Nesta ocasión, a actividade desenvolveuse no CPR Plurilingüe Cervantes, onde os xogadores do primeiro equipo Lago Junior e Pere Haro compartiron unha xornada co alumnado.
Durante a visita, ambos futbolistas mantiveron un encontro próximo cos estudantes, que lles formularon preguntas sobre a súa traxectoria profesional, o deporte e distintas curiosidades relacionadas co fútbol. Tras o turno de preguntas, os xogadores participaron nun xogo xunto ao alumnado, nunha xornada marcada pola participación e a ilusión da rapazada.
Ao rematar a actividade, Lago Junior e Pere Haro entregaron tarxetas personalizadas e invitacións para o partido deste domingo fronte ao CF Talavera no Anxo Carro, encontro que se disputará ás 20:30 horas e ao que están convidados todos os alumnos e alumnas do centro.
Desde o club anímase á afección a asistir ao encontro, malia o horario, para apoiar o equipo nun partido importante no que o respaldo da bancada volverá ser fundamental.
O CD Lugo quixo agradecer ao CPR Plurilingüe Cervantes as facilidades ofrecidas, así como a boa acollida e o trato recibido tanto polo alumnado como polo profesorado, que fixeron da xornada unha experiencia especialmente positiva.