O CD Lugo arroupa o seu equipo Genuine antes do inicio dunha nova tempada
O Club Deportivo Lugo reuniu este venres no estadio Anxo Carro varios representantes do primeiro equipo e do seu conxunto Genuine nunha xornada marcada pola convivencia, os reencontros e o compañeirismo. O encontro serviu para quentar motores de cara ao comezo dunha nova edición da LALIGA GENUINE Moeve, que botará a andar a próxima fin de semana en Tarragona.
O adestrador albivermello, Borja Fernández, acudiu acompañado dos futbolistas Álex Gallar, Mateo Muñoz e Jorge Candal, que aproveitaron a visita para compartir un tempo cos integrantes do equipo inclusivo. Durante a tarde houbo ocasión de conversar, lembrar vivencias e intercambiar anécdotas nun ambiente distendido.
Os membros do primeiro equipo tamén quixeron trasladarlles os seus mellores desexos para a campaña que está a piques de comezar. Ademais de animalos a afrontar con ilusión esta nova experiencia, lembráronlles a importancia de gozar dunha competición na que volverán coincidir con xogadores e xogadoras doutros clubs e na que os vínculos persoais teñen un papel destacado.
A xornada reservou tamén un momento especial para os agasallos, xa que todos os integrantes do Genuine recibiron un detalle. Unha sorpresa que puxo o punto final a unha tarde na que o club volveu estreitar os lazos entre os distintos equipos que forman parte da entidade.
A iniciativa serviu para amosar, unha vez máis, a unión que existe dentro da familia albivermella e para facer chegar ao conxunto inclusivo o apoio de todo o club antes de iniciar unha nova tempada de fútbol, amizade e valores compartidos.