O CD Lugo e Caixa Rural Galega renovan a súa colaboración por unha tempada máis
O Club Deportivo Lugo e Caixa Rural Galega prolongaron o seu acordo de colaboración para a tempada 2026/27, dando continuidade a unha relación entre ambas as entidades que se mantén desde hai máis de 30 anos.
A renovación permitirá manter o apoio de Caixa Rural Galega ao conxunto albivermello, así como a súa presenza no Anxo Carro, nunha colaboración que se mantivo ao longo das diferentes etapas da historia do club lucense.
O acto de renovación contou coa presenza, por parte do CD Lugo, do presidente Ronald Baroni e do director xeral, Adrián Raguza. En representación de Caixa Rural Galega participaron o director xeral, Jesús Méndez, e o director comercial, José Manuel López.
Como principal novidade para esta tempada, a entidade financeira patrocinará desde setembro un premio mensual ao mellor xogador albivermello. Serán os propios afeccionados do CD Lugo os encargados de decidir o gañador mediante votación a través das canles oficiais do club.
Deste xeito, o novo recoñecemento permitirá aos seguidores escoller cada mes o futbolista que consideren máis destacado polas súas actuacións durante ese período.
As dúas entidades agradeceron mutuamente a confianza e o apoio mantidos durante máis de tres décadas e destacaron a súa disposición a continuar colaborando ao longo da tempada 2026/27.