O CD Lugo e o Breogán brillan cunha dobre vitoria que impulsa o deporte lucense
O deporte lucense viviu unha fin de semana de celebracións coas vitorias do Club Deportivo Lugo e do Río Breogán nas súas respectivas competicións. O equipo de fútbol impúxose á AD Mérida por 2-1 no Anxo Carro para afianzarse no liderado, mentres que o conxunto de baloncesto asaltou o Multiusos do Sar cun contundente 90-110 ante o Monbus Obradoiro, nun derbi galego que deixou novos rexistros para a entidade celeste.
O CD Lugo regresou este domingo á senda da vitoria cun triunfo que lle permite manter o pleno de éxitos como local e ampliar a cinco puntos a súa vantaxe sobre o segundo clasificado. Os homes de Borja Fernández realizaron unha excelente primeira metade e souberon xestionar a renda tras o descanso. Aínda que sufriron nos últimos minutos, cando o rival apretou, os albivermellos defenderon o resultado con firmeza ata o asubío final.
O calendario non dá tregua ao conxunto lucense, que xa prepara a súa próxima cita ligueira. O CD Lugo visitará o CP Cacereño este venres, ás 19:00 horas, no Estadio Príncipe Felipe, coa intención de prolongar a súa boa dinámica e conservar a súa posición de privilexio na clasificación.
Pola súa banda, o Río Breogán protagonizou unha das grandes actuacións da xornada na Liga Endesa ao derrotar o Monbus Obradoiro por 90-110 no primeiro derbi galego da tempada. O equipo dirixido por Luis Casimiro dominou o encontro cunha destacada exhibición ofensiva e sumou a súa cuarta vitoria do curso, nun partido no que o colectivo celeste se mostrou superior ao seu rival.
O triunfo tivo, ademais, un valor histórico para o club lucense. Os 110 puntos anotados supoñen a maior cifra acadada polo Breogán ante un rival galego na máxima categoría do baloncesto nacional e tamén establecen un novo récord anotador do equipo como visitante. Os 20 puntos de diferenza final permitiron igualar, ademais, a maior marxe de vitoria da entidade nun derbi autonómico, un rexistro que se remontaba a 1991, cando o daquela Dyc Breogán vencera o OAR Ferrol por 89-69.
A dobre alegría dos dous principais equipos lucenses reforza o protagonismo da cidade no deporte galego e nacional. Mentres o CD Lugo consolida a súa candidatura na parte alta da clasificación, o Breogán colle impulso cunha vitoria de prestixio que combina o éxito colectivo cunha actuación ofensiva para o recordo.