O CD Lugo Genuine inicia unha nova tempada chea de ilusión
O Club Deportivo Lugo Genuine ten xa sinaladas no calendario as datas da nova tempada da LALIGA Genuine, que chega á súa oitava edición mantendo vivo o espírito que a converteu nunha das competicións máis especiais do panorama deportivo.
O conxunto albivermello volverá competir con entusiasmo e deportividade nun proxecto que promove a integración a través do fútbol, compartindo experiencias con máis de corenta clubes de todo o país.
Na primeira fase, o Lugo viaxará a Tarragona os días 22 e 23 de novembro, onde se enfrontará ao Granada CF, Córdoba CF e Fundación Atlético de Madrid.
A segunda fase celebrarase en Xixón os días 7 e 8 de marzo, con duelos fronte ao CA Osasuna e o Real Valladolid.
Na terceira parada, o equipo albivermello desprazarase a Burgos os días 30 e 31 de maio para medirse á SD Eibar Fundazioa e ao Dépor Genuine, mentres que a fase final disputarase en Madrid os días 20 e 21 de xuño, con Nàstic de Tarragona, Levante UD EDI e CD Tenerife como rivais.
Unha tempada máis, o CD Lugo Genuine afronta esta aventura con orgullo, ilusión e o firme propósito de seguir sendo un exemplo de deporte con valores, representando a Lugo e á súa afección con sorrisos, esforzo e corazón.