Álex Costa e Kike Hermoso reforzan o ataque e a defensa do CD Lugo
O CD Lugo continúa a completar o seu cadro de xogadores para a tempada 2026/27 coa incorporación de Álex Costa e Kike Hermoso, dous novos reforzos destinados a fortalecer tanto a liña ofensiva como o centro da defensa do conxunto albivermello.
Álex Costa chega procedente do Sevilla FC tras o acordo alcanzado entre ambos os clubs para o seu traspaso. O dianteiro, nado en Madrid en 2003 e de 1,91 metros de altura, comprométese co Lugo para as dúas próximas tempadas.
A pesar da súa xuventude, Costa xa conta cunha ampla experiencia en Primeira Federación, categoría na que disputou máis de 68 encontros coa SD Ponferradina e o Sevilla Atlético, equipo no que militou durante a pasada campaña. O atacante suma 14 goles nesta categoría e chega para achegar presenza física, capacidade de remate e novas alternativas ao ataque lucense.
Pola súa parte, Kike Hermoso reforzará o eixo da defensa. O central, tamén madrileño, naceu en 1999 e asina por unha tempada, cunha opción para continuar unha campaña máis en función do cumprimento de determinados obxectivos.
Hermoso conta cunha traxectoria que abrangue diferentes categorías do fútbol español e tamén experiencias internacionais. Comezou a súa carreira profesional na SD Ejea e posteriormente incorporouse ao filial do Real Betis Balompié, co que chegou a debutar co primeiro equipo e marcou o seu primeiro gol en Primeira División fronte ao CA Osasuna, en El Sadar.
O defensa tamén militou no Vilafranquense portugués e no Rayo Majadahonda, antes de dar o salto ao fútbol polaco. O seu último equipo foi o Arka Gdynia, co que conseguiu o ascenso á máxima categoría do fútbol polaco na súa primeira tempada. No conxunto da súa carreira acumula máis de 140 partidos entre Primeira Federación, a antiga Segunda División B, Primeira División e as competicións de Portugal e Polonia.
Con estas dúas incorporacións, o CD Lugo suma efectivos con diferentes perfís para reforzar dúas posicións importantes do equipo. Costa achegará alternativas e capacidade ofensiva, mentres que Hermoso incorporará experiencia e percorrido ao centro da zaga.
Ambos os xogadores incorporaranse á dinámica de traballo do primeiro equipo para comezar a preparar xunto aos seus novos compañeiros a tempada 2026/27.
Achore Sánchez incorpórase ao CD Lugo para as dúas próximas tempadas
O Club Deportivo Lugo incorporou Achore Sánchez ao seu primeiro equipo para as dúas próximas tempadas. O lateral dereito, nacido en 2005, chega procedente do Ourense CF para reforzar o costado dereito da defensa albivermella.
O futbolista, de perfil sub-23, achega xuventude e proxección ao cadro lucense e convértese nunha nova opción para completar o lateral dereito do equipo de cara á tempada 2026/27.
Achore Sánchez incorporarase proximamente á dinámica de adestramentos cos seus novos compañeiros.