O CD Lugo incorpora a Antonio Perera para reforzar o centro do campo
O futbolista Antonio Perera incorpórase ao primeiro equipo do Club Deportivo Lugo para esta tempada, nun movemento co que a entidade albivermella busca fortalecer o centro do campo neste segundo tramo da competición. O xogador xa se atopa en Lugo e integrarase de inmediato na dinámica de adestramentos do conxunto lucense.
Antonio Perera, nacido en Badaxoz en 1997, é un centrocampista habituado a actuar como eixo da medular, destacando pola súa capacidade para achegar orde, criterio e solidez ao xogo do equipo. Aos seus 28 anos, conta cunha traxectoria destacada tanto no fútbol nacional como no internacional, o que lle permite chegar a Lugo cun importante bagaxe competitivo.
Formado nas categorías do Deportivo Alavés, o futbolista extremeño acumulou experiencia no estranxeiro con etapas no NK Istra de Croacia e, máis recentemente, no Botev Plovdiv de Bulgaria, club no que militou durante as tres últimas tempadas. Co conxunto búlgaro disputou un total de 57 partidos oficiais, nos que achegou dous goles e tres asistencias, ademais de proclamarse campión da Copa de Bulgaria na tempada 2023/24.
Tras esta etapa internacional, Perera regresa agora ao fútbol español para sumarse ao proxecto do CD Lugo, co obxectivo de achegar equilibrio e experiencia ao centro do campo albivermello. O xogador asinou contrato polo que resta da presente tempada e unha máis, estendendo a súa vinculación co club ata o ano 2027.