O CD Lugo iniciará a pretempada o 16 de xullo e disputará oito amigables en Galicia, León e Asturias
O Club Deportivo Lugo xa ten definido o seu plan de traballo para a pretempada 2025-2026. O retorno do primeiro equipo está programado para os días 14 e 15 de xullo, datas nas que se realizarán os correspondentes recoñecementos médicos.
A primeira sesión de adestramento sobre o terreo de xogo terá lugar o mércores 16 de xullo, dando comezo á preparación do equipo antes do inicio oficial da competición, previsto para a fin de semana do 30 e 31 de agosto.
Ao longo deste período, o cadro albivermello afrontará un total de oito encontros amigables, que se desenvolverán en distintas localidades de Galicia, León e Asturias. Estes partidos servirán como banco de probas para o novo proxecto do club de cara á vindeira tempada.
O primeiro amigable está fixado para o 26 de xullo, aínda con rival, escenario e horario pendentes de confirmación. Posteriormente, o Lugo medirase ao Real Oviedo Vetusta o 30 de xullo en Luarca (19:00 h); ao RC Celta Fortuna o 2 de agosto en Portonovo (19:30 h); e ao Bergantiños FC o 6 de agosto en Pol (19:00 h).
O 9 de agosto xogará fronte á Cultural Leonesa en Foz (12:00 h), e o 13 de agosto enfrontarase á SD Ponferradina en Bembibre (19:00 h). O 16 de agosto será a quenda da SD Compostela en Vilalba (19:00 h) e o ciclo de amigables pecharase o 21 de agosto contra a UD Ourense en Ourense (20:00 h).
Esta serie de encontros permitirá ao corpo técnico avaliar o rendemento do plantel e afinar os detalles tácticos antes do inicio da competición oficial.