O CD Lugo presentará todos os seus equipos durante o partido contra a Ponferradina
Os diferentes equipos do Club Deportivo Lugo serán presentados durante un acto que se desenvolverá durante o enfrontamento entre o equipo de 1ªRFEF e a SD Ponferradina este sábado no estadio Anxo Carro.
Con esta iniciativa, desde a entidade deportiva lucense queren mostrar todos os seus equipos, desde alevín ata o filial no caso da canteira, así como os equipos femininos e o da LIGA Genuine.
Así, din que “será un día moi especial para todas as persoas que representan ao club nas distintas categorías do noso fútbol, polo que animamos aos nosos afeccionados a que formen parte dun momento único”.
Ademais, destacan que “é unha oportunidade” para poder gozar do xa tradicional ‘Derbi dos Ancares’, que terá lugar este sábado, 14 de decembro, a partir das 17.00 horas, que acollerá gran afección de ambos equipos.