O CD Lugo súmase a 'A nosa Champions' para promover o deporte inclusivo
O Club Deportivo Lugo participará este domingo, 23 de marzo, na primeira xornada de A nosa Champions, unha iniciativa impulsada pola Real Federación Galega de Fútbol (RFGF) co obxectivo de fomentar a inclusión e os valores do deporte.
O encontro celebrarase no campo de Rebordelo, en Calo (Teo), coa colaboración do club anfitrión, SR Calo, e o CD Lugo compartirá terreo de xogo con outros cinco clubs galegos: RC Deportivo, RC Celta, Racing Club Ferrol, Racing Club Villalbés e o propio SR Calo.
A xornada desenvolverase nun formato non competitivo, con premios para todas as persoas participantes, co propósito de poñer en valor principios como a igualdade, a integración e o compañeirismo.
A plantilla do CD Lugo para esta cita estará composta por xogadores e xogadoras procedentes de distintas entidades sociais: Francis, Rochela, Cristian, Josué e Álex; Iván Denis e Carlos Yanes (ASPNAIS); Adrián e Diego Villar (San Vicente de Paúl); Javi Cortiñas, Diego, Nito, Salva e Pablo Ríos (PRODEME); Rubén (ALUME); e Fidel (ADACE).
Con esta participación, o CD Lugo reafirma o seu compromiso co deporte como ferramenta de inclusión social, apostando por unha práctica deportiva accesible, respectuosa e aberta a todas as persoas.