O CEI-Nodus forma a futuros empregados de Primark en Lugo
O CEI-Nodus do Concello de Lugo está a acoller nestes días varias xornadas formativas dirixidas ao persoal seleccionado para traballar na nova tenda de Primark que se abrirá no centro comercial As Termas.
Esta colaboración entre o Concello e a empresa internacional ten como fin facilitar a formación e fomentar a xeración de emprego na cidade.
O CEI-Nodus, un dos centros máis avanzados da provincia en innovación e emprendemento, cedeu as súas instalacións para que os futuros traballadores de Primark reciban a capacitación necesaria para integrarse no proxecto.
Esta acción busca preparar aos empregados para as diferentes áreas de actividade que cubrirá a nova tenda, asegurando un equipo altamente cualificado para satisfacer as necesidades dos clientes e ofrecer un servizo de calidade.
A creación de emprego xerada pola apertura de Primark en Lugo será un impulso para a dinamización económica da cidade. O Concello, a través do CEI-Nodus, pon á disposición de empresas de grande envergadura como Primark a súa infraestrutura para apoiar tanto o proceso de selección de persoal como a súa formación, reforzando o seu compromiso co fomento do emprego e o desenvolvemento económico do municipio.
A inauguración desta nova tenda de Primark xerará un número significativo de postos de traballo e, ademais, contribuirá á consolidación de Lugo como un centro de atracción comercial e turístico para a provincia.
Neste sentido, o Concello de Lugo reitera o seu compromiso coa mellora das condicións laborais e co desenvolvemento económico da cidade, mantendo o seu apoio á creación de postos de traballo e á formación profesional a través de iniciativas como esta.