O Centro Educativo Galen celebra o seu 25 aniversario cun ciclo de conferencias aberto á cidadanía
O Centro Educativo Galen conmemora o seu 25 aniversario cunha programación especial que pon o foco na educación como motor de transformación social. Tras un cuarto de século de traxectoria, o centro destaca a súa evolución cunha idea clara: ofrecer unha formación de calidade, centrada nas persoas e orientada non só ao desenvolvemento académico do alumnado, senón tamén ao seu crecemento humano.
No marco desta celebración, o centro organiza un ciclo de tres conferencias que busca abrir un espazo de reflexión sobre os retos actuais e futuros da educación. A proposta contará coa participación de tres profesionais de referencia que, desde ámbitos diferentes, comparten unha visión transformadora do ensino.
Entre eles estará César Bona, recoñecido internacionalmente polo seu labor docente e finalista do Global Teacher Prize en 2015, quen abordará a necesidade dunha educación máis humana, creativa e conectada coa realidade. O seu traballo caracterízase por fomentar a participación activa do alumnado, o pensamento crítico e valores como o respecto, a empatía e a cooperación, aspectos que tamén recolle nas súas publicacións sobre innovación educativa.
Xunto a el participará o psicólogo Antonio Ríos, que centrará a súa intervención na relevancia do acompañamento emocional e do benestar no proceso educativo. Ao longo da súa traxectoria, Ríos destacou polo seu compromiso coa formación integral das persoas e pola súa aposta pola educación como ferramenta para mellorar a calidade de vida, tanto a nivel individual como colectivo.
O ciclo completarase coa presenza de Xurxo Mariño, neurocientífico e divulgador galego, quen ofrecerá unha visión rigorosa e accesible sobre o funcionamento do cerebro e os procesos de aprendizaxe. A súa labor investigadora e divulgadora, recoñecida recentemente pola Real Academia Galega das Ciencias, contribúe a achegar a ciencia á sociedade e a fomentar o pensamento crítico.
Desde a organización subliñan que a elección destes tres perfís responde á vontade de integrar tres piares fundamentais na educación actual: a docencia, a saúde emocional e o coñecemento científico, considerados esenciais para construír un modelo educativo con sentido e proxección de futuro.
As conferencias estarán abertas a toda a cidadanía, máis alá do ámbito estritamente educativo. O centro busca así implicar a familias, alumnado, profesionais e público en xeral nunha reflexión compartida sobre o papel da educación na sociedade.
Con esta iniciativa, o Centro Educativo Galen non só celebra o camiño percorrido durante estes 25 anos, senón que tamén reafirma o seu compromiso cunha educación innovadora, inclusiva e de calidade, agradecendo ao mesmo tempo a confianza depositada polas familias ao longo da súa traxectoria.