O Cineclube Mádia Leva celebra en Lugo a Revolución dos Cravos cunha proxección e música en vinilo
O Cineclube Mádia Leva organizará este xoves 30 de abril, a partir das 20:00 horas, unha xornada especial no centro social Mádia Leva de Lugo para conmemorar a Revolución dos Cravos portuguesa.
A programación inclúe a proxección do filme Sambizanga, dirixido por Sarah Maldoror, unha das figuras pioneiras do cinema feminista e anticolonial. A película aborda as loitas de liberación nacional nas colonias africanas, converténdose nunha obra de referencia dentro do cinema político e comprometido.
Coa iniciativa, a organización busca lembrar a transcendencia histórica da revolución portuguesa e, ao mesmo tempo, poñer en valor creacións cinematográficas vencelladas aos movementos emancipadores e á defensa dos dereitos dos pobos colonizados.
Unha vez rematada a proxección, a actividade continuará cunha pinchada en vinilo de música afro-luso-galaico-brasileira a cargo dos DJ’s Extra-parlamentares, que pecharán a velada cunha proposta musical ligada ás culturas atlánticas e lusófonas.