O Club de Lectura de Fillos do Chaira organiza un encontro coa escritora Lucía Solla en Rábade
O Club de Lectura de Fillos do Chaira ten preparada unha cita especial para este Nadal cun encontro coa escritora Lucía Solla, que terá lugar este venres 26 de decembro ás 19:30 horas no Centro Sociocultural de Rábade. A autora participará nunha conversa arredor do seu libro Comerás flores, nun acto aberto a todo o público.
A actividade desenvolverase en formato de encontro en liña, permitindo un diálogo directo coa escritora para afondar na súa obra, no proceso creativo e nos temas que aborda esta publicación. Trátase dunha proposta cultural pensada tanto para persoas integrantes do club como para lectoras e lectores interesados en achegarse á literatura contemporánea galega.
Desde Fillos do Chaira destacan que esta iniciativa se enmarca dentro da programación especial de Nadal da asociación, coa vontade de achegar a cultura e a lectura á veciñanza e de crear espazos de encontro arredor dos libros. A entidade anima á participación e convida á cidadanía a non perder esta oportunidade de coñecer de preto a Lucía Solla e a súa obra.