Deportes

O club albivermello confirma os futbolistas con contrato en vigor, as baixas e o regreso de xogadores tras finalizar as súas cesións

O CD Lugo fixo pública a situación contractual dos xogadores que formaron parte do primeiro equipo durante a última tempada, así como dos futbolistas que manteñen actualmente un vínculo contractual coa entidade albivermella de cara ao novo curso.

Neste momento, os futbolistas do primeiro persoal que teñen contrato en vigor co club son Marc Martínez, Yago Rodríguez, Ibaider Garriz, Álex Gallar, Pere Haro, Jorge González, Antonio Perera, Kevin Presa, Nico Reniero, Gabriel Costa, Teofilovic e Samanes. A estes nomes súmanse tamén as incorporacións anunciadas ata a data: Alberto Ulloa, que chega en condición de cedido, e Chiqui.

Ao mesmo tempo, a entidade confirmou que varios xogadores rematan a súa relación contractual co club e non continuarán formando parte da disciplina albivermella. Trátase de Pablo Trigueros, Víctor Pastrana, Iker Piedra, Diego Caballo, Iker Unzueta, Iago López, Lago Junior, Josep Gayà e Borja Sánchez.

Estas saídas engádense ás xa comunicadas previamente polo club, correspondentes a José Amo e Txus Alba, que tampouco seguirán no primeiro equipo durante a próxima tempada. Ademais, Neco Celorio conclúe o seu período de cesión.

Por outra banda, unha vez finalizadas as súas respectivas cesións, Jon Merino, Alberto Freire e Fernando Embadje regresarán á disciplina do CD Lugo. Pola contra, Maycon e Jaume Cuéllar non continuarán formando parte da entidade.

O club lucense quixo agradecer publicamente a todos os xogadores que pechan a súa etapa na entidade o traballo realizado, así como o compromiso e a profesionalidade amosados durante o tempo no que defenderon a camiseta albivermella, desexándolles ademais éxito nos seus futuros proxectos profesionais e persoais.