O colectivo de pensionistas da CIG mobilízase este mércores nas sete cidades galegas en defensa da sanidade pública
O colectivo de persoas xubiladas e pensionistas da CIG desenvolverá este mércores, 20 de maio, mobilizacións en centros sanitarios das sete cidades galegas para reclamar unha sanidade pública “digna e de calidade” e denunciar o que consideran un proceso de desmantelamento e privatización do sistema sanitario galego.
As protestas forman parte da campaña que o colectivo leva impulsando nos últimos meses en defensa da atención sanitaria pública e dos servizos asistenciais, especialmente no relativo á situación da Atención Primaria, as listas de espera e a falta de persoal sanitario.
As concentracións celebraranse de maneira simultánea en diferentes hospitais das principais cidades galegas. Na Coruña terá lugar ás 11.00 horas no Hospital Abente y Lago; en Ferrol será ás 11.30 horas no Hospital Marcide; en Santiago de Compostela desenvolverase ás 12.00 horas diante do Hospital Clínico; mentres que en Lugo está convocada ás 11.30 horas na entrada principal do HULA.
Tamén haberá mobilizacións en Ourense, ás 11.30 horas no Hospital Santa María Nai; en Pontevedra, á mesma hora no Hospital Provincial; e en Vigo, ás 11.30 horas diante da entrada de Consultas Externas do Hospital Álvaro Cunqueiro.
Desde o colectivo de pensionistas da CIG insisten na necesidade de reforzar o sistema sanitario público e garantir unha atención sanitaria accesible e de calidade para toda a cidadanía, especialmente para as persoas maiores.