O Concello de Castroverde incorpora un novo tractor municipal para reforzar o mantemento das vías públicas
O Concello de Castroverde ampliou o seu parque móbil coa incorporación dun novo tractor municipal, unha adquisición que permitirá mellorar os labores de mantemento e conservación da rede viaria local, así como outras tarefas de servizo público no municipio.
O vehículo adquirido é un tractor seminovo modelo Case IH Puma 165, subministrado pola empresa AGRÍCOLA CALVO S.L., que resultou adxudicataria da operación. Segundo informou o Concello, a maquinaria comezará a traballar de maneira inmediata nos labores de desbroce e limpeza das estradas municipais, contribuíndo a reforzar a seguridade e a conservación das infraestruturas viarias.
A compra supuxo un investimento total de 70.754,30 euros. Desta contía, 50.000 euros foron achegados pola Deputación de Lugo, mentres que os 20.754,30 euros restantes foron financiados con fondos propios municipais.
Para levar a cabo a operación, o Concello entregou como parte do pagamento un antigo tractor municipal da marca SAME que se atopaba avariado. Segundo explicou a administración local, o estado do vehículo facía inviable a súa reparación, polo que se optou por substituílo por unha maquinaria máis moderna e eficiente.
Desde o goberno municipal destacan que esta incorporación permitirá optimizar os recursos destinados ao mantemento dos espazos públicos e ofrecer unha resposta máis eficaz ás necesidades de conservación das vías e das zonas verdes do concello.