O Concello de Friol remata a obra de mellora no núcleo de Miraz
O Concello de Friol vén de concluír os traballos de acondicionamento e posta en valor do núcleo rural de Miraz, unha intervención que supuxo un investimento de arredor de 150.000 euros e que foi executada pola empresa pública Tragsa, coa financiación íntegra da Xunta de Galicia.
A actuación permitiu renovar de maneira substancial a imaxe e funcionalidade deste núcleo, resolvendo os problemas derivados do desgaste acumulado nos accesos e mellorando a integración dos espazos comúns. Co remate das obras, os veciños dispoñen agora de vías máis cómodas e seguras, adaptadas ás necesidades do día a día e pensadas para favorecer a convivencia.
Os traballos centráronse na retirada do pavimento deteriorado, respectando as cotas existentes para garantir a correcta adaptación ás vivendas. Nas zonas que carecían de firme axeitado procedeuse á adecuación da base e ao posterior formigonado. Como acabado final, instalouse pavimento de formigón desactivado (árido visto), que combina resistencia e integración estética coa contorna rural. Ademais, colocáronse dous bancos sobre base de granito e acondicionouse unha pequena área verde que contribúe a humanizar o espazo.
O alcalde, José Ángel Santos, subliñou que “a mellora progresiva dos nosos núcleos rurais é unha prioridade para este equipo de goberno. Cada intervención supón avanzar cara a un municipio máis coidado, accesible e preparado para o futuro”. Así mesmo, agradeceu a implicación da Xunta de Galicia por facer posible, a través do seu apoio económico, a execución desta iniciativa.
Con esta actuación xa finalizada, o Concello continúa a súa folla de ruta orientada á conservación e revitalización das parroquias, consolidando un modelo de desenvolvemento que aposta polo equilibrio entre modernización, respecto pola contorna e benestar veciñal.