O Concello de Lugo abre as súas plantas potabilizadora e depuradora á cidadanía
Coincidindo coa celebración do Día Mundial da Auga, o vindeiro 22 de marzo, o Concello de Lugo e a empresa responsable da xestión da auga na cidade, Gestagua, ofrecerán visitas guiadas á Estación de Tratamento de Auga Potable (ETAP) e á Estación Depuradora de Augas Residuais (EDAR).
A partir do xoves 6 de marzo, estas instalacións fundamentais no ciclo integral da auga abrirán as súas portas á cidadanía e o prazo de solicitude para os centros escolares segue aberto ata o 28 de febreiro a través das canles habituais.
Ata a data, máis de 800 alumnos participaron nesta iniciativa, e estímase que máis de 1.500 o fagan nesta nova edición. As visitas estarán dispoñibles entre os meses de marzo, abril e maio e poderán solicitarse para grupos de ata 30 persoas.
Este programa de visitas enmárcase dentro dun proxecto máis amplo de divulgación ambiental impulsado polo Concello de Lugo e Gestagua. Con el, preténdese concienciar ás xeracións presentes e futuras sobre a necesidade de coidar e preservar a auga, un recurso esencial para a vida na cidade.
Ademais dos centros educativos da provincia de Lugo, este ano tamén participarán centros de Ourense. Calquera colectivo, asociación veciñal ou outro grupo interesado en visitar estas instalacións poderá realizar a súa solicitude a través do correo electrónico: lugo@gestagua.es.