O Concello de Lugo duplicará as conexións de autobús con Nadela tras modificar varias liñas
O tenente alcalde de Lugo, Rubén Arroxo, informou dos acordos adoptados na Xunta de Goberno, na que se deu luz verde a diversas medidas vinculadas ás áreas de Mobilidade e Infraestruturas, Participación e Educación, con especial incidencia no servizo de transporte urbano e en distintas actuacións municipais.
Entre as decisións máis destacadas figura a modificación do contrato do autobús urbano para incrementar as conexións con Nadela. A reestruturación das liñas 1.2 e 5.2-5DS permitirá optimizar quilómetros e ampliar en catro servizos o percorrido da liña 3.2 ata este núcleo, ao tempo que se mellora a puntualidade da 5.2. No caso das liñas 5.2 e 5DS, adiántase o xiro en Ramón Ferreiro ata o cruzamento con Salvador de Madariaga en lugar de realizalo na Praza Xaquín Lourenzo, o que supón un aforro estimado de 2 minutos por volta e un total de 30 minutos diarios nas 15 voltas efectuadas, atendendo así ás queixas da veciñanza de Castelo polos atrasos rexistrados.
Ademais, a liña 1.2 modificará o seu itinerario nas fins de semana, pasando a circular pola Avenida Infanta Elena en vez de por Benigno Rivera, o que libera quilómetros para que a liña 3.2, que actualmente xira na Nacional VI á altura do Torre de Núñez, poida estender o seu traxecto ata Nadela en catro expedicións diarias. Deste xeito, este barrio pasará de dispoñer de catro servizos ao día a contar con oito: catro correspondentes á liña 11, ás 10:00, 12:00, 17:00 e 20:50 horas, e outros catro da liña 3.2, ás 08:30, 13:30, 15:30 e 18:30 horas, reforzando de maneira notable o transporte público nesta zona.
No ámbito das infraestruturas, iniciouse o proceso de licitación para renovar a rampa de acceso á Praza de Abastos de Lugo pola rúa Tuñas Bouzón, tras detectarse deficiencias estruturais na infraestrutura actual. A intervención conta cun orzamento base de 122.041,46 euros e un prazo de execución estimado de 3 meses. A actuación permitirá alongar a rampa para reducir a súa pendente, mellorar a comodidade das persoas usuarias e reforzar as condicións de accesibilidade, aproveitando o espazo dispoñible ata a liña de fachada do edificio.
A Xunta de Goberno aprobou tamén novas actuacións no cemiterio municipal, onde a empresa Sanle asumirá o asfaltado das rúas 1 e 2 por un importe de 120.195,48 euros. Os traballos contemplan a retirada do antigo rego asfáltico, moi deteriorado, e a súa substitución por un pavimento de formigón impreso reforzado con malla de aceiro, así como a instalación de sistemas de recollida de augas pluviais e novas canalizacións eléctricas, dentro do proceso progresivo de mellora da rede viaria interior.
A mesma empresa executará as obras de renovación da rúa Picasso, unha vía peonil situada entre Ronda de Fingoi e rúa Armórica, empregada habitualmente como acceso ao centro de saúde de Fingoi. O contrato, por valor de 83.366,66 euros, inclúe a renovación da beirarrúa, a creación dunha zona verde, a instalación de alumeado público —do que carece na actualidade— e a mellora da rede de saneamento.
No referente aos mercados municipais, aprobouse a continuidade dun posto no mercado de Frisa despois de que a súa titular acreditase a regularización da súa situación tributaria, resolvendo así a única pendencia existente e garantindo o exercicio da actividade en plena legalidade.
No eido educativo, a Xunta de Goberno acordou impoñer unha sanción á empresa encargada das actividades extraescolares municipais por incumprimentos reiterados e desatención ás instrucións do Concello. A penalización ascende a 2.572,91 euros, equivalente ao 5 % do importe do contrato, dentro da marxe legal establecida entre o 1 % e o 10 % segundo a gravidade das infraccións.
Finalmente, abordouse a situación das obras da rúa Milagrosa. O Goberno local inadmitiu a solicitude de modificación do contrato e a recusación da dirección de obra presentada pola empresa adxudicataria, ao considerar que a renovación do saneamento pode asumirse mediante a liquidación e o reaxuste doutras partidas sen necesidade de alterar o contrato, e rexeitando a substitución dos técnicos municipais responsables da dirección facultativa.
Ante o atraso acumulado, acordouse tamén a suspensión do contrato coa empresa Urbaconsa Lugo SL. As obras, iniciadas o 21 de xullo de 2025 cun prazo de execución de 9 meses, presentan a día 18 de febreiro un grao de execución do 9,8 %, cando debería situarse arredor do 80 %, permanecendo practicamente paralizadas desde o 19 de decembro pese ás indicacións da dirección de obra. O Concello considera o atraso totalmente inxustificado e superior ao límite do 30 % fixado pola Lei de Contratos do Sector Público nos artigos 193 e 211.1-F, o que permite iniciar o procedemento de resolución. A decisión abre agora un prazo de alegacións para a empresa e dará paso a unha nova licitación que podería demorarse entre 3 e 4 meses, ampliando os prazos previstos pero garantindo, segundo o Executivo local, a correcta execución da actuación e a defensa do interese público.