O Concello de Lugo impulsa novos contratos para mellorar servizos municipais
A Xunta de Goberno Local do Concello de Lugo aprobou un amplo paquete de medidas orientadas á mellora dos servizos públicos, ao reforzo da seguridade nas instalacións municipais e ao impulso de distintos proxectos de recuperación de espazos e benestar animal.
Entre os acordos adoptados destaca a incorporación ao patrimonio municipal do quiosco da Praza Maior, un paso previo necesario para a súa recuperación e posta en funcionamento. O Concello prevé agora levar a cabo tarefas de baleirado, limpeza e acondicionamento co obxectivo de habilitar neste espazo un baño público e un punto de información turística, co que se busca ampliar os servizos nun dos enclaves máis representativos da cidade.
A Xunta de Goberno deu tamén luz verde á contratación do servizo de cociña, comedor e lavandería da Escola Infantil Gregorio Sanz, cun orzamento de 234.000 euros. O contrato actual finaliza o 31 de xullo de 2026, polo que o Goberno municipal decidiu anticiparse para garantir a continuidade da prestación sen interrupcións nin riscos para as familias usuarias.
No ámbito da seguridade, aprobouse a contratación do servizo de mantemento dos sistemas de protección contra incendios dos edificios municipais, un contrato que se atopaba caducado desde 2022. Este servizo inclúe a revisión de extintores, sistemas de detección e alarma, sinalización de emerxencia e outros elementos fundamentais para garantir a seguridade das instalacións, que o Goberno considera prioritario actualizar.
A sesión tamén serviu para avanzar na contratación do servizo de roza das pistas municipais, unha prestación considerada básica para a zona rural e que debería estar xa operativa nesta época do ano, polo que se acelerou a súa tramitación para evitar novos atrasos.
Ademais, aprobouse o proxecto de renovación integral da pista de atletismo Gregorio Pérez Rivera, cun orzamento de 679.980 euros, dentro da liña de mellora das instalacións deportivas municipais e para dar resposta a unha demanda histórica das persoas usuarias.
No ámbito do benestar animal, tamén se deu luz verde a un plan de mellora e control das colonias felinas, acompañado de accións de formación e concienciación social no municipio.
Durante a sesión tamén se deu conta do nomeamento de Javier Arias Fouz como director xeral de urbanismo. Así mesmo, acordouse a prórroga do servizo de soporte, mantemento e actualización da plataforma municipal de venda de entradas, e a contratación a Cogami da subministración de material de imprenta reservada a centros especiais de emprego de iniciativa social.
Desde o Goberno local destacan que todos estes acordos responden á vontade de seguir avanzando na mellora dos servizos públicos e de actuar con previsión na xestión dos contratos municipais.