O Concello de Lugo inicia a renovación integral do asfalto na rúa da Agricultura
Comezaron os traballos de renovación completa do firme na rúa da Agricultura, situada no polígono do Ceao, nunha actuación impulsada pola Tenencia de Alcaldía de Lugo. O tenente de alcalde, Rubén Arroxo, sinalou que o Goberno local continúa a “traballar na mellora das áreas industriais da cidade, reservando cada ano unha partida orzamentaria relevante para garantir un mantemento axeitado destas vías”, tendo en conta o elevado volume de tráfico pesado que soportan. Segundo explicou, esta actuación permitirá reforzar a seguridade viaria nunha contorna cun tránsito intenso de vehículos de gran tonelaxe.
A obra conta cun investimento total de 143.320,20 euros e un prazo de execución estimado en 12 semanas. Os traballos foron adxudicados á empresa Francisco Gómez y Cía SL e inclúen a retirada da antiga tubaxe de fibrocemento para substituíla por unha nova condución de fundición dúctil. Ademais, renovarase a capa de rodadura mediante a aplicación de asfalto en quente, respectando a cota actual do pavimento, e procederase á actualización da sinalización horizontal.
Arroxo avanzou tamén que no 2026 a Tenencia de Alcaldía continuará a impulsar actuacións nas zonas industriais da cidade, consignando unha partida de 250.000 euros destinada ao mantemento dos viais. Ao seu xuízo, este esforzo inversor contribuirá a que máis empresas escollan os polígonos lucenses para establecer a súa actividade. O edil puxo en valor o labor desenvolvido nos últimos anos, incidindo en que todas as intervencións teñen como prioridade incrementar a seguridade viaria nestes espazos produtivos.