O Concello de Lugo inicia o proceso para nomear a Fernando Ónega Fillo Adoptivo a título póstumo
O Concello de Lugo puxo en marcha o expediente para conceder, a título póstumo, o nomeamento de Fernando Ónega como Fillo Adoptivo da cidade, iniciando así os trámites para outorgarlle unha das máximas distincións honoríficas do municipio.
A decisión responde á iniciativa promovida polo lucense Julio Méndez, quen impulsou unha campaña de adhesións coa finalidade de solicitar este recoñecemento institucional ao prestixioso xornalista. A proposta obtivo un amplo respaldo social e contou co apoio de numerosos colectivos e entidades.
Unha vez completado o proceso administrativo correspondente, a proposta será levada ao pleno ordinario do mes de xullo para a súa aprobación definitiva.
Antes do inicio oficial do expediente, a alcaldesa de Lugo, Elena Candia, informou persoalmente a Julio Méndez sobre o comezo da tramitación dunha iniciativa nacida desde a sociedade civil. Ademais, trasladou a proposta aos voceiros do PSOE e do BNG durante a Xunta de Portavoces, solicitando o apoio de todas as formacións políticas para lograr o maior consenso institucional posible arredor desta distinción.
A rexedora tamén mantivo contactos coa familia de Fernando Ónega, coa que se acordou que, unha vez aprobado o recoñecemento, o acto institucional de entrega do título teña lugar o vindeiro 7 de agosto ás 18 horas. Na xornada está prevista a asistencia dos familiares do xornalista, entre eles a tamén xornalista e escritora Sonsoles Ónega.
Fernando Ónega, natural de Mosteiro, no municipio de Pol, desenvolveu unha das traxectorias máis destacadas do xornalismo español, converténdose nun referente no ámbito da comunicación política e da análise da actualidade ao longo de máis de cinco décadas. Durante a súa carreira mantivo unha estreita relación con Galicia e, especialmente, coa súa terra natal e coa cidade de Lugo, contribuíndo a proxectar estes territorios máis aló do ámbito galego.
Co inicio deste expediente, o Concello busca dar resposta a unha petición xurdida desde a sociedade civil e avanzar no recoñecemento dunha figura que deixou unha pegada relevante na historia do xornalismo español.