O Concello de Lugo presume de apoiar ás asociacións de recreación histórica do Arde Lucus
O Concello de Lugo presentou as bases reguladoras das subvencións destinadas ás asociacións de recreación histórica que participan no Arde Lucus. O concelleiro de Urbanismo, Deportes e Xuventude, Jorge Bustos, foi o encargado de trasladarlles esta información nun encontro celebrado na Casa da Xuventude.
Durante a reunión, o edil explicou os detalles dun sistema que permitirá financiar tanto os gastos derivados da propia festa como aqueles vinculados á súa promoción fóra da cidade. Esta iniciativa cobra especial relevancia nun ano marcado polo 25 aniversario do evento, no que o Goberno local incrementou ata os 180.000 euros a partida destinada ás asociacións, o que representa o 43 % do orzamento municipal do Arde Lucus.
Entre as principais novidades destaca a posibilidade de recibir ata o 90% da subvención de forma anticipada, co obxectivo de facilitar o funcionamento destes colectivos. Ademais, amplíanse de maneira significativa os conceptos que poden ser xustificados e establécese un 10% da axuda que non precisará acreditación documental, ao considerarse destinado a gastos de difícil xustificación.
As bases reguladoras recollen aspectos como os tipos de gastos subvencionables, a normativa aplicable, os prazos ou os mecanismos de pagamento. O período de execución dos proxectos abranguerá do 1 de xaneiro ao 31 de decembro deste ano, mentres que a data límite para xustificar a totalidade das axudas será o 31 de xaneiro de 2027.
No que respecta aos gastos financiables, inclúense investimentos para a mellora e ampliación dos campamentos, adquisición de vestiario e materiais, formación específica en recreación histórica, alugueiro de espazos, nóminas, publicidade, subministracións ou desprazamentos a outros eventos. Tamén se permitirá destinar ata un 20% da contía á manutención dos socios participantes nas actividades, sempre conforme á lexislación vixente e excluíndo produtos prexudiciais para a saúde.
Do mesmo xeito, poderán sufragarse gastos indirectos relacionados co funcionamento das asociacións, como luz, telefonía, internet, seguros, xestoría ou mantemento web, cun límite máximo do 20% da subvención. Para importes inferiores a 50 euros, admitirase a xustificación mediante ticket de caixa.
O novo marco tamén contempla a creación dunha comisión mixta de seguimento, control e avaliación, encargada de supervisar o desenvolvemento do convenio e resolver posibles dúbidas. Segundo destacou Jorge Bustos, trátase dunha mellora relevante que permitirá “blindar” estas axudas e avanzar cara a unha organización máis eficiente da festa, mantendo a porta aberta ás achegas das asociacións implicadas.