O Concello de Lugo renovará a praza de Alicante

LugoXa
O Goberno de Lugo aprobará hoxe o inicio do procedemento de licitación, que terá un orzamento de partida de 210.885,27 euros.
bng Praza de Alicante
bng Praza de Alicante
6 jul 2022

O tenente alcalde e responsable de Mobilidade do Concello de Lugo, Rubén Arroxo, anunciou que o goberno de Lugo renovará a praza de Alicante, no barrio da Milagrosa. “Trátase dunha zona que está nun avanzado estado de desgaste, o que fai preciso unha actuación integral que permita renovar a pavimentación, poñendo solución ás zonas de socavóns que podemos ver actualmente”, explicou Rubén Arroxo.

A solución que executará a área de Mobilidade e Infraestruturas consiste na renovación integral do pavimento, creando dúas zonas diferenciadas para o tránsito peonil e o dos vehículos, mantendo as zonas de estacionamento. Ademais, renovarase o mobiliario urbano, ampliando o total de bancos instalandos na zona, e cunha nova disposición que permitirá unha maior comodidade á veciñanza, e instalaranse novas papeleiras e xardineiras.

O Goberno de Lugo avanzará tamén con esta intervención na renovación da rede de alumeado público municipal, eliminando as actuais luminarias de vapor de sodio, e instalando LEDs, de baixo consumo, e que garantirá un alumeado uniforme en toda a extensión da praza.

A Xunta de Goberno aprobará mañá o inicio do procedemento de contratación desta actuación, que sairá a licitación cun orzamento máximo de 210.885,27€ e un prazo de execución de 6 meses.