O Conservatorio de Danza de Lugo ofrece dúas galas gratuítas no Auditorio Municipal Gustavo Freire
As distintas agrupacións do Conservatorio de Danza (CDAN) de Lugo actuarán no Auditorio Municipal Gustavo Freire, dando continuidade á programación de danza organizada anualmente pola Tenencia de Alcaldía a través do ciclo Lugo en Danza.
A veciñanza poderá asistir de forma gratuíta ás dúas galas protagonizadas por alumnas e alumnos do conservatorio, retirando previamente as entradas no portal entradaslugo.es. A primeira gala terá lugar este martes, 24 de marzo, e inclúe unha representación de danza contemporánea. O segundo evento celebrarase o mércores 25 de marzo e ofrecerá unha mostra de danza clásica. Ambas as audicións comezarán ás 20:00 horas.
“Desde a Tenencia de Alcaldía, a través da área de Cultura, traballamos por fomentar o coñecemento da danza apostando cada ano por múltiples programacións e propostas arredor desta arte”, explicou Rubén Arroxo.
“Lugo conta co único Conservatorio Profesional de Danza de Galicia, e desde a Tenencia de Alcaldía apostamos por darlle visibilidade a un centro e ensinanzas que axudan a desenvolver habilidades e capacidades artísticas, ao mesmo tempo que permiten dar a coñecer diferentes vertentes desta disciplina”, destacou Arroxo.