O CV Emevé incorpora o colocador Daniel Pena Mariño para a tempada 2026/27
O CV Emevé reforza a súa plantilla masculina para a tempada 2026/27 coa incorporación de Daniel Pena Mariño, un colocador monfortino de 17 anos e 1,89 metros de altura que chega ao conxunto lucense como unha aposta polo talento e a proxección do voleibol galego.
Pena conta xa con experiencia nos programas de formación da Federación Española de Voleibol e nas seleccións nacionais de categorías inferiores. O novo xogador do Arenal Emevé chega ao club despois dun verán no que volveu vestir a camiseta de España e no que conseguiu a medalla de bronce no WEVZA U19 disputado en Frankfurt.
«Dani é un colocador novo, traballador e con moito marxe de crecemento. Vai adestrar nun contexto de máxima esixencia e queremos axudalo a seguir evolucionando e desenvolvendo as súas cualidades», sinala José Valle.
Natural de Monforte de Lemos, Daniel Pena comezou a xogar ao voleibol con nove anos e incorporouse pouco despois ao Korbis, club no que desenvolveu boa parte da súa formación durante seis tempadas. Nas categorías de base foi progresando como colocador e chegou a proclamarse, entre outros resultados, subcampión de España na categoría alevín.
A súa evolución chamou a atención dos técnicos da Federación Española de Voleibol. Tras participar en diferentes concentracións das seleccións nacionais de categorías inferiores, en 2025 foi seleccionado para incorporarse á Concentración Permanente de Palencia, unha estrutura destinada á formación de mozos xogadores con maior proxección dentro do voleibol español.
Precisamente durante unha concentración da selección española en Cuenca recibiu a noticia da súa incorporación a este programa. Desde entón, Pena compaxinou a súa formación académica cunha preparación deportiva diaria de alto nivel, incrementando o volume e a esixencia dos seus adestramentos e continuando a súa evolución nunha posición especialmente complexa como é a de colocador.
Aos seus 17 anos, o novo xogador do Arenal Emevé destaca pola súa capacidade para construír o xogo e buscar diferentes solucións para os seus atacantes. É unha característica que xa amosaba durante a súa etapa no Korbis, onde desenvolveu unha maneira de entender a posición baseada na procura de alternativas en cada xogada.
Para Valle, a súa incorporación debe entenderse desde esa perspectiva de formación e crecemento. «A posición de colocador necesita tempo, experiencia e moita capacidade para interpretar o xogo. Dani ten aínda moito percorrido por diante, pero é un rapaz moi traballador e iso é fundamental. Queremos que aproveite cada adestramento e que vaia adquirindo as ferramentas que necesita para competir a este nivel», explica o técnico.
O traballo diario será tamén determinante para as oportunidades que poida ter ao longo da tempada. O corpo técnico pretende que o novo colocador se desenvolva dentro da dinámica do primeiro equipo e que sexa a súa propia evolución a que marque o protagonismo que vaia adquirindo durante o curso.
«Vai ter a posibilidade de traballar connosco e de competir polas súas oportunidades. A partir de aí dependerá de como adestre, de como evolucione e tamén das necesidades que vaia tendo o equipo. O importante agora é que siga medrando e manteña esa capacidade de traballo», engade Valle.
A súa chegada permite ademais ao Arenal Emevé contar cun xogador formado no voleibol galego que, a pesar da súa idade, xa coñece contextos de adestramento e competición de alto nivel. A súa formación no Korbis de Monforte, o traballo desenvolvido na Concentración Permanente e a súa presenza coas seleccións españolas de categorías inferiores conforman o percorrido dun xogador que aínda conta cun amplo marxe de desenvolvemento.
A medalla de bronce conseguida este verán en Frankfurt representa o recoñecemento máis recente a esa progresión. Dani Pena afrontará agora a súa primeira tempada no Arenal Emevé co obxectivo de continuar a súa formación, adaptarse ás esixencias do equipo e aproveitar cada oportunidade para seguir medrando como colocador.