O eclipse solar marcará o inicio das fiestas de Rábade
Rábade vivirá do 12 ao 16 de agosto unha intensa programación festiva que combinará música, tradición, deporte e actividades para todas as idades. As festas deste ano estarán ademais marcadas por un acontecemento excepcional, xa que o municipio celebrará diferentes propostas arredor da eclipse solar total do 12 de agosto, coincidindo co ano do centenario da vila.
A programación arrancará oficialmente o luns 10 de agosto co inicio das actividades deportivas no Campo da Feira, aínda que o primeiro gran evento chegará o mércores 12, cando ás 12.00 horas terá lugar no Centro Sociocultural a conferencia 'Eclipse total dende Rábade', impartida por Estrella Gutiérrez-Marco, meteoróloga e directiva da AEMET. Xa pola tarde, ás 19.00 horas, organizarase unha concentración na zona do campo de fútbol para seguir a eclipse con lentes especiais.
O xoves 13 será a quenda do XXX Rabafolc, unha das citas máis emblemáticas da programación cultural. A xornada comezará coa XIX Tour da Cervexa e continuará co pregón, que este ano correrá a cargo do atleta Javier Vázquez Orejas, recentemente protagonista por completar o World Marathon Majors. A noite estará dedicada á música tradicional e folk coa participación de Mestura de Nete, O Breo, Airiños da Freba e Eris Mackenzie.
O venres 14, declarado festivo local, terá como protagonistas a música e o río. Haberá sesión vermú con Nueva Fuerza, concerto da banda Sons e Soños e os tradicionais xantares campestres na beira do Miño. Pola tarde celebrarase a XXIV Esbatuxada Descenso do Río Miño, unha divertida competición de embarcacións de fabricación caseira, acompañada pola actuación da Banda Xuvenil da Escola Municipal de Música e un concerto pop-rock á beira do río. A verbena correrá a cargo de Nueva Fuerza e da orquestra Royal Espectáculo.
O sábado 15 estará dedicado á patroa, con misa solemne e procesión na honra á Virxe, sesión vermú con La Noria, o tradicional Día da Bicicleta e a quedada para intercambio de cromos do Mundial. Pola noite terá lugar a XX Descarga Pirotécnica da Peña O Foguete de Rábade, seguida dunha gran verbena con La Noria e a actuación internacional do grupo Monterojo, antes dos fogos artificiais.
As festas rematarán o domingo 16 cunha nova misa solemne, unha longa sesión vermú amenizada polo Grupo Fortuna e DJ Casanova, unha gran festa infantil e a animación musical de DJ Francis, ademais da representación da obra de teatro 'Niqui Ñaque', protagonizada por Dani Lago e Ángel Blanco.
O Concello e a comisión organizadora convidan á veciñanza e aos visitantes a participar nunhas festas que combinan tradición, cultura popular, gastronomía, deporte e grandes actuacións musicais, convertendo Rábade nun dos principais puntos festivos da provincia durante a segunda quincena de agosto.