O Ensino asegúrase a presenza na Copa da Raíña tras unha destacada primeira volta
O equipo de Baloncesto Ensino certificou a súa clasificación para a Copa da Raíña, que se celebrará en Tarragona entre o 26 e o 29 de marzo, despois de completar unha sólida primeira volta na Liga Endesa de baloncesto feminino. O conxunto lucense pechou esta fase inicial da competición na sexta posición da táboa, un resultado que lle permitiu situarse entre os oito primeiros clasificados que accederán ao torneo.
Con motivo deste logro, a Delegación Territorial recibiu a unha ampla representación do club nun encontro encabezado polo presidente do Ensino, Manuel Durán. Durante a recepción, púxose en valor o nivel deportivo e o esforzo continuado do equipo, un traballo que, segundo se destacou, acaba reflectíndose en obxectivos cumpridos como esta clasificación para unha das citas máis importantes do baloncesto feminino estatal.
O delegado territorial, Javier Arias, trasladou os seus desexos de boa sorte ao equipo de cara ao que resta de tempada, tanto na segunda volta da Liga como na propia Copa da Raíña. Ademais, subliñou que estar entre os mellores conxuntos do país supón “todo un éxito” e un recoñecemento ao camiño percorrido polo club.