Deportes

O conxunto lucense, con gran parte da súa canteira na plantilla e unha afección entregada, culmina unha tempada de superación cun ascenso “feito desde casa”

Imaxe de Alba Arias

O equipo sénior da ACD Piringalla vén de conseguir o ascenso a Segunda Futgal tras impoñerse ao O Incio nunha final decidida nos penaltis (2-2 no tempo regulamentario), nun encontro no que o conxunto lucense volveu demostrar capacidade de superación e resistencia.

Desde o club destacan que hai apenas un ano o equipo descendera de categoría, pero que aquel golpe serviu como punto de partida dun proxecto que nunca se interpretou como un final, senón como o inicio dunha nova etapa. Un ano despois, e tras unha tempada marcada pola loita constante, o equipo conseguiu reverter a situación e coroar o esforzo cun ascenso moi especial.

O partido do pasado domingo estivo marcado polas dificultades, xa que o equipo tivo que competir cun xogador menos desde os primeiros minutos tras unha expulsión. Aínda así, os xogadores lograron manterse no encontro, competir ata o final e forzar unha eliminatoria que acabou resolvéndose desde os once metros.

Trátase dun ascenso que desde o club cualifican como diferente, xa que chegou tras superar múltiples adversidades e co apoio constante dunha afección que acompañou ao equipo en todo momento. Destacan especialmente o papel da chamada “marea Naranja”, que encheu As Gándaras no partido de ida e realizou un desprazamento masivo a O Incio para empurrar ao equipo ata o final.

O club subliña tamén o carácter especial deste logro, xa que boa parte da plantilla formouse na propia canteira da entidade, defendendo os mesmos cores desde a base, o que fai que o ascenso sexa aínda máis significativo para a familia deportiva do club.

O ascenso é, segundo remarcan, un logro colectivo no que participan xogadores, corpo técnico, familias e afección, nunha tempada que queda marcada pola emoción e a resistencia.