O Festivaliño On The Road achegará o cine infantil ao alumnado de Castroverde
O alumnado de Educación Infantil e Primaria do CPI Plurilingüe de Castroverde desfrutará o vindeiro luns, 5 de outubro, dunha mañá dedicada ao cine coa chegada do Festivaliño On The Road, unha iniciativa itinerante que busca achegar a cultura audiovisual aos máis pequenos a través dunha selección de curtametraxes adaptadas ás súas idades.
A actividade, impulsada polo Concello de Castroverde, desenvolverase entre as 10:30 e as 13:30 horas e permitirá que os escolares participen por quendas nunha experiencia cinematográfica pensada para combinar o entretemento coa aprendizaxe. A través das diferentes proxeccións, os nenos e nenas poderán descubrir novas historias e achegarse ao mundo do cine dun xeito lúdico e educativo.
O Festivaliño On The Road é unha caravana itinerante que leva o cinema infantil a diferentes localidades, co propósito de facilitar o acceso á cultura audiovisual desde as primeiras etapas educativas e estimular a imaxinación e a creatividade da rapazada.