O Foro Feminista de Lugo rexeita o nomeamento de Alfonso Villares como subdelegado da Xunta en Lugo
O Foro Feminista de Lugo expresou o seu rexeitamento rotundo ao nomeamento de Alfonso Villares como subdelegado da Xunta de Galicia na provincia de Lugo. A organización lembra que o exconselleiro do Mar presentou a súa dimisión catro meses despois de coñecerse unha denuncia por violencia sexual en febreiro de 2025.
O colectivo destaca que a Audiencia Provincial da Coruña acordou un sobresemento provisional do caso e non un sobresemento libre, como solicitaba a defensa, o que implica que o procedemento non queda pechado de maneira definitiva e podería reabrirse no caso de aparecer novas probas. No auto xudicial sinálase, segundo apuntan, a existencia dun déficit probatorio que impide a apertura de xuízo oral, sen que isto supoña unha afirmación sobre a non existencia dos feitos.
Neste contexto, o Foro Feminista de Lugo considera que o nomeamento de Villares transmite unha mensaxe política inaxeitada e critica que se lle outorgue unha responsabilidade institucional de primeiro nivel malia non ter sido declarado xudicialmente inocente. O colectivo enmarca esta postura nunha reflexión máis ampla sobre a violencia machista como expresión dunha desigualdade estrutural que limita dereitos e liberdades fundamentais nunha sociedade democrática.
Así mesmo, lembra que os poderes públicos están obrigados a traballar pola eliminación da violencia contra as mulleres, tal e como recollen as normas autonómicas, estatais e internacionais. Porén, denuncian que en demasiadas ocasións representantes políticos sinalados ou investigados por este tipo de feitos ocupan cargos de relevancia institucional.
O Foro Feminista de Lugo reivindica que os cargos públicos deben acreditar cunha traxectoria coherente o seu compromiso coa igualdade entre mulleres e homes, como condición indispensable para evitar a normalización social da violencia machista e como mostra de respecto cara ás vítimas, ás que recoñecen as dificultades engadidas que afrontan á hora de denunciar e obter reparación.
O colectivo conclúe a súa postura reclamando, máis alá de declaracións formais, xustiza e reparación efectiva para as vítimas.