O Grao de Relacións Laborais e Recursos Humanos de Lugo integrarase nun centro propio da USC
A Universidade de Santiago de Compostela (USC) e a Fundación Campus Universitario de Lugo deron un paso decisivo para garantir a continuidade do Grao en Relacións Laborais e Recursos Humanos no Campus de Lugo, coa sinatura dun protocolo que permitirá a integración destes estudos nun centro propio da USC a partir do curso 2026/2027.
O reitor da USC, Antonio López Díaz, e o presidente da Fundación, Jaime Luis López Vázquez, selaron o acordo nun acto celebrado na Sala de Xuntas da Deputación de Lugo, acompañados polo presidente da Deputación, José Tomé Roca, e a vicerreitora de Titulacións e Internacionalización, María José López Couso.
Ata agora, este grao viña sendo impartido por un centro adscrito, a Escola de Relacións Laborais de Lugo, adscrita á USC desde 1995. A nova etapa implicará a súa incorporación á Facultade de Relacións Laborais da propia universidade, garantindo así a plena integración académica e institucional dos estudos.
O reitor destacou que esta integración permitirá ao alumnado acceder a todos os dereitos recoñecidos ao estudantado de centros propios da USC, incluídas as bonificacións na matrícula. Ademais, o cambio facilitará os procesos de reacreditación do título e contribuirá a reforzar a calidade da docencia.
Plan de estudos e transición ordenada
A efectividade da integración coincidirá coa implantación dun novo plan de estudos do grao, prevista para o inicio do curso 2026/2027. Para facer realidade este proceso, crearase un grupo de traballo mixto encargado de elaborar os convenios específicos necesarios para a transición.
Tanto a USC como a Fundación comprometéronse a garantir unha integración ordenada e respectuosa coa situación laboral do actual persoal docente e administrativo. A adaptación ás novas condicións farase conforme á normativa vixente, prevendo períodos transitorios para quen precise tempo adicional para cumprir os requisitos de acreditación, sen que iso implique perda de condicións laborais.
Con este acordo, USC e Fundación Campus Universitario de Lugo reafirman a súa aposta pola continuidade e fortalecemento da oferta universitaria no Campus de Lugo, dando estabilidade a uns estudos cunha longa traxectoria na cidade.