O Grupo Socialista acusa a Candia de retirar fondos a nove proxectos para financiar San Fiz
O Grupo Municipal Socialista de Lugo, a través da súa voceira adxunta, Ana González Abelleira, denunciou a política económica do Goberno local de Lugo, ao que acusa de modificar reiteradamente as prioridades orzamentarias para financiar actuacións de impacto inmediato e cumprir obxectivos de promoción persoal, en detrimento doutros investimentos necesarios para a cidade. Como exemplo, sinala a proposta de transferencia de crédito TC 36/2026, que prevé retirar 1.892.007,37 euros de nove proxectos municipais para financiar a primeira fase do Centro Deportivo Municipal de San Fiz, unha decisión que considera precipitada e marcada pola falta de planificación.
"O que cuestionamos non é que Lugo necesite unha cidade do deporte. Defendemos ese proxecto, que foi ideado polo noso Concello, e queremos que se desenvolva con todas as garantías, incluído o pavillón previsto na planificación anterior. O que non aceptamos é que Candia pretenda financiar unha actuación retirando recursos a outros nove proxectos que tamén responden a necesidades reais da veciñanza, mentres orienta a política municipal a cumprir obxectivos de promoción persoal", afirma a portavoz adxunta socialista.
Os socialistas consideran que a operación evidencia unha falta de planificación global. Defenden que o complexo deportivo debe responder a un proxecto completo, con infraestruturas adecuadas ás necesidades dos clubs e do deporte base, pero tamén encaixar nunha estratexia de investimentos que garanta a mellora equilibrada do conxunto do municipio. Por iso, reclaman ao Goberno local que explique que alternativas de financiamento estudou antes de retirar crédito ás actuacións afectadas.
A portavoz adxunta vincula esta decisión cunha orientación económica máis ampla que, segundo denuncia, está a converter os recursos acumulados polo Concello nun instrumento para financiar actuacións a curto prazo. O Goberno local incorpora máis de tres millóns de euros de aforro municipal procedente dos remanentes e, segundo os datos que manexa o Grupo Socialista, contempla destinar outros 200.000 euros a eventos. Para o PSOE, estas decisións deben analizarse conxuntamente e xustificarse en función do seu interese público, da súa utilidade e das necesidades que seguen pendentes.
O expediente de transferencia de crédito incorpora un informe da Intervención municipal do 16 de outubro, de carácter favorable con observacións. O PSOE reclama que se dea a coñecer o alcance destas e que o Goberno explique as consecuencias da operación sobre a execución dos proxectos afectados e a planificación económica dos próximos exercicios. Os socialistas consideran imprescindible que as decisións sobre o destino dos aforros municipais se adopten con transparencia e cunha avaliación rigorosa das prioridades.
"O problema non é só como se gasta o diñeiro público. É que prioridades se están sacrificando, que futuro se está comprometendo e que cidade se está deixando de construír. Lugo non ten que escoller entre San Fiz e os seus barrios. O que necesita é un Goberno capaz de planificar, buscar alternativas de financiamento e compatibilizar os investimentos. Candia debe explicar por que para financiar unha actuación retira recursos a outras nove e que pensa facer para que esas necesidades non queden atrás. Non se pode gobernar pensando antes na promoción persoal que no interese xeral", conclúe González Abelleira.