O lucense Nico Adega participa en Valladolid no II Congreso Estatal de Xuventude con Discapacidade
O deportista lucense Nico Adega participou esta tarde no II Congreso Estatal de Xuventude con Discapacidade, que se celebra en Valladolid baixo o lema “O dereito a un proxecto de vida propio”. O campión do mundo e de Europa de paracanoe na modalidade de maratón KL3 interveu nunha mesa dedicada ao acceso da mocidade con discapacidade á vida social.
A mesa redonda, titulada “Ocio, deporte e cultura: o dereito a participar”, abordou as barreiras que aínda condicionan a participación dos mozos e mozas con discapacidade en diferentes ámbitos. Adega compartiu espazo coa cantautora e creadora de contido Laura Diepstraten e co coordinador de animación e deporte de ONCE Castilla y León, Daniel Sanz, nunha sesión moderada polo xogador de baloncesto Ignacio “Pincho” Ortega.
A súa intervención está estreitamente ligada á súa propia experiencia. Aos sete anos, Nico Adega superou un osteosarcoma na rodilla dereita e, tras o tratamento, os especialistas advertíronlle de que non podería volver practicar deporte. O deportista, con todo, continuou buscando alternativas e en cada revisión propoñía novas disciplinas que puidese practicar ata que descubriu o piragüismo.
Para Adega, manter a práctica deportiva foi fundamental para recuperar unha parte da súa vida que perdera durante os anos posteriores á enfermidade. “Cando me monto na piragua, as miñas limitacións quedan fóra”, explica o deportista.
A súa traxectoria levouno desde entón ata a elite internacional. En 2025 proclamouse campión do mundo de maratón KL3 en Győr, Hungría, e en xuño de 2026 conseguiu tamén o título europeo na mesma modalidade, polo que actualmente ostenta ambos os títulos.
Ademais da súa participación no maratón, Adega compite na proba de 200 metros coa vista posta na clasificación para os Xogos Paralímpicos de Los Ángeles 2028, nos que aspira a representar a España.
A súa experiencia deportiva tamén lle permitiu comprobar que a inclusión require algo máis que vontade ou acceso ás actividades. Segundo a súa perspectiva, son necesarios medios, recursos e condicións que permitan ás persoas con discapacidade desenvolver as súas capacidades en igualdade.
Con 20 anos, o deportista compaxina a carreira deportiva cos estudos de Enxeñaría Informática e coa súa actividade como divulgador e conferenciante. Nestas intervencións aborda cuestións como o deporte, a inclusión, a identidade, a xestión da presión e a resiliencia a partir da súa propia experiencia.