O lucense Óscar Rodríguez de Vivero clasifícase para a final do Mundial de Oratoria en español
O orador lucense Óscar Rodríguez de Vivero, presidente da Asociación Más Debate, conseguiu a súa clasificación para a gran final do Campionato Mundial de Oratoria en español, organizado pola Rede Latinoamericana de Cooperación Universitaria e a Liga Española de Debate. Fíxoo tras finalizar en primeira posición do ranking internacional ao remate da terceira fase da competición.
O campionato comezou con preto de 500 participantes de distintos países e chegou á fase semifinal con 30 aspirantes que competían por unha das catro prazas para a final. A clasificación definitiva estableceuse a partir das valoracións do xurado técnico e do apoio recibido nas votacións populares a través das redes sociais, onde Rodríguez de Vivero contou cun amplo respaldo da cidadanía e, especialmente, da súa cidade natal, Lugo, o que lle permitiu liderar a táboa clasificatoria.
Esta será a segunda final internacional na traxectoria do orador galego. En 2024 xa disputou a fase final do Mundial de Oratoria celebrado en Bos Aires (Arxentina), onde se proclamou subcampión do mundo. Co seu pase á edición de 2026, Rodríguez de Vivero regresa á elite da oratoria en español e convértese na segunda persoa que logra acceder a dúas finais internacionais na historia deste campionato.
O propio orador agradeceu o apoio recibido durante esta fase da competición. "O apoio recibido por parte da xente, da miña cidade e de todos os que dedicaron un minuto a votar o meu discurso sobre a incerteza foi incrible. Afrontar a final no primeiro posto é unha motivación enorme para o que vén en Colombia", afirmou.
A gran final do Campionato Mundial de Oratoria disputarase o vindeiro mes de outubro en Cali (Colombia), onde os catro finalistas competirán polo título internacional de 2026. O lucense chega á cita cun destacado currículo, no que figuran este segundo acceso a unha final mundial, o título de mellor orador de España conquistado en 2024 e o terceiro posto nacional acadado en 2025.