O Ministerio de Transportes reanudará en maio as obras de rehabilitación do firme da N-540
A subdelegada do Goberno en Lugo, Isabel Rodríguez, anunciou hoxe a continuidade das obras de rehabilitación do firme na estrada N-540, durante unha visita técnica realizada ao punto quilométrico 57 da vía, no termo municipal de Chantada. A actuación, impulsada polo Ministerio de Transportes e Mobilidade Sostible, entrará nunha nova fase a partir do mes de maio, coa renovación completa do tramo entre Chantada e Lugo.
Durante a visita, Rodríguez estivo acompañada por Iago Fonteboa, enxeñeiro técnico de Obras Públicas do MITMS en Lugo; Begoña Abeledo, xefa de obra da empresa contratista Taboada e Ramos; e Óscar Catoira, da asistencia técnica de control e vixilancia, ademais do alcalde de Taboada, Roi Rigueira, e distintos representantes públicos dos concellos da comarca.
“O Goberno continúa a apostar pola modernización da rede viaria estatal na provincia de Lugo. Esta obra é fundamental para garantir unha mobilidade segura e eficiente, especialmente nunha estrada con tanto tránsito como a N-540”, asegurou a subdelegada, engadindo que “sabemos da necesidade dos usuarios da vía por acometer estas actuacións, pero insistimos no compromiso do Goberno con feitos para dar resposta e solución a este problema”.
Máis de 68 km de actuación
A obra abrangue a rehabilitación integral do firme entre os quilómetros 0,000 e 68,900 da N-540 ao seu paso pola provincia de Lugo. Inclúe a renovación estrutural e superficial do firme, así como actuacións complementarias destinadas a manter os niveis de servizo da infraestrutura.
O proxecto contempla o fresado do firme existente, recrecido con capas sucesivas e aplicacións de adherencia. Nas zonas máis deterioradas executarase a demolición completa do paquete de firmes e a escavación dun metro de profundidade para repoñer as capas dende a base. Tamén se regularizarán as beiravías e mellorarase a sinalización horizontal e vertical.
A subdelegada salientou que a intervención supón un salto cualitativo na seguridade viaria, sinalando que “non se trata só de renovar o asfalto, senón de adaptar a estrada ás necesidades actuais, protexendo aos colectivos máis vulnerables, como ciclistas e motoristas”.
A actuación prevé tamén a reposición de elementos técnicos clave, como as estacións de aforo e as xuntas de dilatación das pontes do tramo.
O firme da N-540 foi executado no ano 1996 e, ao longo destes anos, sufriu diversas reparacións, moitas delas a base de lechadas bituminosas. A intervención actual supón unha rehabilitación estrutural en profundidade. Esta obra está incluída no programa de conservación e mantemento da Rede de Estradas do Estado, no que o Ministerio leva investidos máis de 120 millóns de euros na provincia de Lugo desde xuño de 2018.