Actualidade

A secretaria de Estado de Enerxía, Sara Aagesen, presidiu onte a cuarta reunión da Mesa de Transición das Pontes, o órgano de coordinación que reúne a representantes do Goberno central, Xunta de Galicia, Concello das Pontes, representantes dos traballadores, colectivo de transportistas e de Endesa, empresa titular da central térmica, situada neste municipio da Coruña, para planificar accións conxuntas que aseguren unha transición xusta na zona.

A secretaria de Estado de Enerxía, Sara Aagesen, presidiu onte a cuarta reunión da Mesa de Transición das Pontes, o órgano de coordinación que reúne a representantes do Goberno central, Xunta de Galicia, Concello das Pontes, representantes dos traballadores, colectivo de transportistas e de Endesa, empresa titular da central térmica, situada neste municipio da Coruña, para planificar accións conxuntas que aseguren unha transición xusta na zona.

Na reunión, Sara Aagesen puxo de manifesto o total compromiso do Ministerio para a Transición Ecolóxica e o Reto Demográfico (Miteco) coa Transición Xusta nas Pontes, presentando o calendario acordado para a valoración do proxecto de co-combustión, acordando o lanzamento do proceso participativo para a elaboración do Convenio de Transición Xusta e unha batería de medidas e axudas para traballar de forma inmediata na reactivación do territorio.

“Fixemos un traballo moi significativo en propostas e medidas de apoio ás zonas, con liñas de axudas para a activación de proxectos, algunhas delas xa están en marcha e reforzaranse durante todo este ano. Estamos comprometidos na procura de proxectos industriais que poidan xerar propostas de futuro para un territorio que se enfronta a desafíos. Cos avances logrados, estamos convencidos de que a transición enerxética vai xerar novas oportunidades nesta zona”.

O PROXECTO DE CO-COMBUSTIÓN

O punto principal da orde de día foi presentar á Mesa o compromiso adquirido entre a empresa e as Administracións para traballar na próximas dúas semanas na valoración da viabilidade económica de proxecto industrial de co-combustión.

Na reunión compartíronse os resultados do informe elaborado polo Comité Técnico no que participaron profesionais da Xunta de Galicia e IDAE (Instituto para a Diversificación e o Aforro da Enerxía) -organismo de Miteco- que avala a viabilidade técnica e ambiental da central térmica das Pontes mediante un proceso de co-combustión.

Tras este informe, Endesa e as tres Administracións acordaron o mércores abrir un proceso de dúas semanas para analizar as solucións técnicas e a viabilidade económica deste proxecto, proceso no que Miteco está plenamente implicado.

NOVAS LINEAS DE AXUDA

O Miteco, dentro do seu compromiso coas persoas e os territorios afectados por unha transición enerxética, continúa traballando para achegar solucións concretas no curto prazo para os afectados.

Froito deste traballo, o Instituto para a Transición Xusta inicia hoxe a consulta pública previa para unha nova convocatoria de axudas que, cun importe de 30 millóns de euros, está destinada a apoiar proxectos empresariais xeradores de emprego e pequenos proxectos de investimento en zonas de Transición Xusta. A estas axudas poderán presentarse as iniciativas xurdidas nas áreas de influencia das centrais térmicas das Pontes e Meirama.

AXUDAS EN MARCHA

Nos próximos días fallarase a liña de axudas por valor de 7 millóns de euros destinada a apoiar iniciativas que teñan como obxectivo a creación de emprego sostible e o fomento da actividade económica nos municipios afectados polo peche de centrais termoeléctricas de carbón, publicada o pasado mes de agosto no BOE.

Doutra banda, o Instituto para a Diversificación e Aforro da Enerxía (Idae) propuxo na súa convocatoria de axudas a proxectos de enerxías renovables, a priorización das zonas de transición xusta. Así, en Galicia, e en colaboración co Goberno da Xunta, aprobouse a concesión de 25 puntos adicionais na valoración de proxectos localizados nestas áreas. En total adxudicáronse 8.4 M€ para instalacións térmicas renovables que mobilizarán 14.5 M€ e outros 12 M€ para instalacións eléctricas que promoverán un investimento de 33 M€.

Ademais, o Goberno de España presentou dentro do Plan de Recuperación, Transformación e Resiliencia da Unión Europea un paquete de medidas específico para zonas de transición xusta por valor de 300 M€. Esta cantidade reforzará o Fondo de Transición Xusta, do que tamén se beneficiarán as zonas afectadas en Galicia.

Dentro deste paquete inclúense axudas por valor de 100 M€ para proxectos infraestruturas municipais, sociais e ambientais aos que se poderán presentar municipios das zonas de influencia das Pontes e Meirama.

A pedimento das organizacións sindicais, o Miteco lanzará proximamente o proceso participativo para a elaboración do Convenio de Transición Xusta da zona de afectación das Pontes, tal como fixo para a área de Meirama.

Na reunión, o Miteco convidou ás Administracións -Xunta e entidades locais- a sumarse a esta proposta a través da firma dun Protocolo de Actuación establecido, que recolle o compromiso de todos para a elaboración e posta en marcha do Convenio que servirá para identificar proxectos e iniciativas empresariais que promovan o cambio de modelo produtivo a partir dos recursos da zona.

INSTRUMENTOS PARA APOIAR A TRANSICIÓN XUSTA

O Miteco traballou na integración de criterios de Transición Xusta nos novos instrumentos da política enerxética para axudar a xerar oportunidades alí onde se producen os desafíos. Así, os cambios que se están producindo están a ter como efecto o afloramiento de novos proxectos estratéxicos.

Por unha banda, o Miteco traballa na creación dunha ferramenta innovadora que permitirá manter o recurso de acceso a rede da central para que poida ser concursada e outorgada a novos proxectos de produción de enerxía renovable que incorporen criterios ambientais, económicos e sociais e de creación de emprego. O proceso de elaboración da futura norma xa superou a fase de consulta pública previa que finalizou o pasado 12 de xaneiro. A posibilidade de acceder a este recurso é, por si mesma, un elemento de dinamización de investimentos e de atracción de proxectos empresariais de alto valor engadido.

O compromiso do Miteco plasmouse tamén na Folla de Roteiro do Hidróxeno Renovable que concede unha atención especial ás zonas de Transición Xusta, dado o potencial que esta tecnoloxía ten para estes territorios e a contribución que pode facer ao seu desenvolvemento. Na convocatoria de interese convocada por Miteco para identificar proxectos de hidróxeno renovable, recibíronse 14 propostas para a provincia da Coruña que inclúen proxectos para As Pontes e Meirama.

A mesma fórmula contémplase na Estratexia de Almacenamento que se aprobará proximamente e que incorpora sinais de priorización para as zonas de Transición Xusta.

MESA DE TRANSICIÓN DAS PONTES

En outubro de 2019 constitúese a Mesa de Transición das Pontes na que participan Miteco; a Consellería de Economía, Emprego e Industria da Xunta de Galicia; Concello das Pontes; sindicatos, a Asociación empresarial do municipio e Endesa, compañía titular da central térmica. Trátase dun órgano de interlocución permanente para avaliar, de forma conxunta, a situación do territorio #ante o posible cesamento de actividade da central térmica, os escenarios de futuro, a oferta de solucións a curto prazo e a planificación de accións posteriores.

Antes da reunión celebrada hoxe producíronse tres encontros: o 2 de outubro de 2019; o 10 de marzo e o 22 de xuño de 2020.

XUNTA DE GALICIA

Pola súa banda, o vicepresidente económico e conselleiro de Economía, Empresa e Innovación, Francisco Conde, trasladou o compromiso da Xunta de Galicia de seguir colaborando na busca dunha solución industrial, requírese tamén da implicación do resto de axentes implicados no proceso. É dicir, que Endesa traballe na viabilidade económica do proxecto e que o Goberno garanta que non autorizará o peche da central ata que se atope dita solución.

O vicepresidente económico incidiu en que os resultados dos informes técnicos elaborados polo Xunta –a través do Inega– e o Ministerio para a Transición Ecolóxica –a través do Idae– corroboran que o uso de biocombustibles nestas instalacións é viable desde o punto de vista técnico e medioambiental. Isto demostra que hai alternativas e que a solución industrial é posible. Por iso, a Xunta ratificou o seu non rotundo ao peche da central e mantense ao carón dos traballadores da central térmica, a industria auxiliar e os transportistas, defendendo os seus empregos.

Conde lamentou a decisión unilateral de Endesa en vez de traballar pola viabilidade da planta a longo prazo, o que garantiría o futuro desta comarca. Neste sentido, lembrou que a compañía ten un compromiso que cumprir: debe seguir pensando no futuro das Pontes tras coñecerse as conclusións do comité técnico.

En paralelo, o vicepresidente económico da Xunta de Galicia solicitou ao Goberno unha folla de ruta clara e definida, e planificación para afrontar unha transición enerxética con garantías que non supoña un desmantelamento da industria e non deixe sen alternativas comarcas enteiras como a de Ferrolterra; unha transición xusta e ordenada que permita o mantemento da actividade industrial e dos empregos.