O Moto Club Lostregos Lucus organizará un curso de seguridade viaria para motoristas en Outeiro de Rei
O Moto Club Lostregos Lucus celebrará o vindeiro 15 de agosto un curso de técnicas de seguridade viaria en motocicleta dirixido a persoas afeccionadas ás dúas rodas que desexen perfeccionar a súa condución e adquirir maiores coñecementos para circular con seguridade.
A iniciativa conta un ano máis coa colaboración do Concello de Outeiro de Rei, que cederá as instalacións do circuíto municipal para o desenvolvemento das sesións prácticas e teóricas previstas durante a xornada.
Segundo explican desde a organización, a actividade está deseñada para un máximo de 12 participantes co fin de ofrecer unha formación máis personalizada. O curso está aberto a motoristas de calquera nivel de experiencia, desde persoas que se iniciaron recentemente ata condutores habituais que queiran mellorar as súas habilidades.
O principal obxectivo da formación é reforzar a técnica de condución e dotar aos participantes de ferramentas para afrontar con maiores garantías diferentes situacións de risco que poden producirse na estrada.
As persoas interesadas en participar poden formalizar a súa inscrición chamando ao teléfono 619 98 78 09.