O nº 42.022 da serie 017, distribuído na provincia de Lugo, primeiro premio do Sorteo de Ouro da Cruz Vermella 2026
O primeiro premio do Sorteo de Ouro da Cruz Vermella, celebrado en Granada e que reparte máis de 23.400 premios —o dobre que na edición anterior— por un valor superior aos 7 millóns de euros, correspondeu ao número 42.022 da serie 017, dotado con 3 millóns de euros, distribuído en Lugo.
O segundo premio de 1 millón de euros recaeu no número 13.959 da serie 036; os 500.000 euros do terceiro premio corresponderon ao número 25.121 da serie 057; 250.000 euros para cada un dos tres cuartos premios: 40.693 da serie 128, 67.731 da serie 120 e 97.573 da serie 006; e 100.000 euros para cada un dos tres quintos premios: 95.498 da serie 027, 48.352 da serie 001 e 08.370 da serie 074.
Ademais dos cinco premios principais, repartíronse milleiros de premios aos números coincidentes con diferente serie á premiada, ou aos coincidentes nas catro últimas cifras con diferentes contías.
Como novidade, este ano tamén obtiveron un premio de 12 euros os boletos cuxas tres últimas cifras coinciden co primeiro premio (022).
As bases e os números premiados poden consultarse na páxina web www.cruzroja.es/sorteodeoro.
Un sorteo que vale ouro
O Sorteo de Ouro da Cruz Vermella é unha iniciativa solidaria con máis de 47 anos de historia que permite á cidadanía, por tan só 6 euros, formar parte dun movemento humanitario que transforma vidas. A súa recadación impulsa a capacidade da Cruz Vermella para actuar ante as grandes emerxencias, pero tamén nas situacións cotiás do día a día que poden afectar a persoas da nosa contorna máis próxima.
Previr e actuar fronte ás crises ambientais, loitar contra a pobreza e a violencia de xénero, dar apoio escolar a nenos e nenas, fomentar a autonomía e a dignidade das persoas maiores ou acompañar na procura de emprego son algunhas das causas nas que traballa a Cruz Vermella e que pode seguir impulsando grazas a iniciativas como esta.