O PM Friol FS reestrutura a súa área deportiva e crea un novo proxecto para xogadores veteranos
O PM Friol FS anunciou unha importante modificación na súa estrutura deportiva coa desaparición do equipo filial e a posta en marcha dun novo proxecto destinado principalmente a xogadores veteranos, co obxectivo de manter o vínculo co club de antigos futbolistas e ofrecerlles a posibilidade de seguir competindo.
A entidade friolesa pecha así unha etapa iniciada na tempada 2016/17, na que o filial permaneceu activo durante nove campañas, interrompidas unicamente polo período da pandemia. Durante boa parte da súa traxectoria participou na competición local, mentres que nas tres últimas tempadas militou en Primeira Futgal.
Segundo explica o club, a decisión responde a diversos factores, sendo o principal a crecente dificultade para completar os cadros de xogadores e incorporar futbolistas novos que permitisen manter a función formativa que tradicionalmente desempeñaba o equipo filial.
Como alternativa, o PM Friol FS impulsará un novo conxunto integrado maioritariamente por veteranos, pensado para que exxogadores, futbolistas históricos da entidade e afeccionados ao fútbol sala poidan continuar vinculados ao club e á práctica deportiva.
A falta dunha competición específica para veteranos, este novo equipo competirá na mesma categoría na que participaba ata agora o filial. Aínda así, desde a entidade subliñan que non será un equipo exclusivamente veterano, xa que tamén poderá incorporar xogadores sub-23 ou mozos con proxección que busquen seguir medrando deportivamente.
O club considera que esta fórmula permitirá combinar a experiencia dos veteranos coa formación de novos talentos, creando unha ponte cara ao primeiro equipo. Neste sentido, lembran casos de futbolistas que seguiron este camiño e acabaron formando parte do cadro principal da entidade.
Con esta reestruturación, o PM Friol FS pretende conservar a súa identidade e reforzar o sentimento de pertenza ao club, ao tempo que mantén unha vía de desenvolvemento para futuras incorporacións ao primeiro equipo.
A directiva quixo agradecer tamén o compromiso de todas as persoas que, ao longo destes anos, contribuíron ao funcionamento do filial e ao crecemento do fútbol sala en Friol, destacando o labor de xogadores, técnicos, colaboradores e afeccionados que fixeron posible a continuidade do proxecto.
Novo adestrador no primeiro equipo
Por outra banda, o club anunciou a incorporación de Gustavo Marqués como novo adestrador do primeiro equipo de cara á tempada 2026/27. O técnico chega ao conxunto friolés para liderar un novo proxecto deportivo avalado por unha ampla experiencia tanto nos bancos como nas pistas de fútbol sala.
Marques desembarca en Friol procedente do Ribeira FS, club no que desempeñou funcións como adestrador do equipo filial e formou parte do corpo técnico do primeiro equipo que acadou o ascenso a Segunda División B na pasada campaña.
A súa traxectoria está estreitamente ligada ao fútbol sala profesional. Como xogador defendeu as cores de entidades de prestixio como Flamengo, FC Barcelona, Azkar Lugo, PSG Móstoles e Cometal Celta, acumulando unha destacada carreira ao máis alto nivel.
Durante a súa etapa en Lugo viviu algúns dos momentos máis brillantes da súa carreira, proclamándose campión da División de Prata, conseguindo o ascenso á máxima categoría e converténdose no máximo goleador da competición con 56 tantos. Ademais, foi distinguido como mellor xogador do campionato.
Desde o Concello de Friol FS destacan que a chegada de Gustavo Marqués achega experiencia, personalidade e un profundo coñecemento do fútbol sala, cualidades que consideran fundamentais para encabezar esta nova etapa da entidade.
O club tamén quixo agradecer publicamente ao Ribeira FS a súa colaboración e a boa disposición amosada durante todo o proceso, facilitando a incorporación do técnico ao proxecto friolés.