O Polo de Friol organiza unha xornada para mellorar a presenza dixital dos pequenos negocios
O Polo de Emprendemento e Apoio ao Emprego de Friol organiza o vindeiro luns 21 de setembro unha xornada formativa sobre como mellorar a presenza dixital dos pequenos negocios e aproveitar as redes sociais como ferramenta para impulsar a súa actividade.
Baixo o título Como medrar en redes sociais: estratexias para mellorar a presenza dixital dos pequenos negocios, a formación desenvolverase entre as 9.30 e as 13.30 horas nas instalacións do Polo de Friol, situadas na rúa Deputación, número 18, primeiro andar.
A actividade está dirixida especialmente a comerciantes, persoas autónomas e emprendedoras, co obxectivo de ofrecerlles ferramentas e coñecementos para aprender a utilizar as redes sociais, mellorar a súa presenza dixital e facer máis visible o seu traballo.
A xornada está organizada polo Polo de Emprendemento e Apoio ao Emprego de Friol e conta coa colaboración de Alfredo López, de Pez Salvaje, e do GDR-4 Comarca de Lugo. A iniciativa enmárcase no traballo de apoio ao comercio e ao emprendemento local, así como na promoción do futuro económico de Friol.