O PP critica os plans propostos pola Deputación e a Alcaldía de Lugo sobre o control das riadas
O voceiro provincial do Partido Popular, Antonio Ameijide, criticou o plan de actuación anunciado polo presidente da Deputación, José Tomé, para mellorar o estado do río Rato e o seu entorno, cualificándoo de “vergoñento” e asegurando que “chega moi tarde”.
Ameijide sinala que os problemas no Rato, así como en zonas como Paradai ou Albeiros, “son sobradamente coñecidos” e que “levamos 18 anos denunciando a situación sen que PSOE e BNG quixeran facer nada”. “É unha vergoña que teña que vir unha tromba de auga para que Tomé recoñeza a realidade”, afirmou o voceiro popular, en referencia aos danos provocados pola recente tormenta que afectou á cidade.
O representante do PP lembra que ao longo destas dúas décadas denunciáronse continuadamente deficiencias na rede de sumidoiros, pozos de tormenta, colectores e nos propios camiños das zonas verdes do municipio. “Agora falan de estar mellor preparados para o futuro, pero se non fixeron nada en 18 anos, por que ían facelo agora?”, preguntouse Ameijide.
DECLARACIÓNS DO PP MUNICIPAL
Desde o Grupo Municipal Popular tamén se sumaron ás críticas, acusando ao alcalde de Lugo de limitarse a “facer anuncios cada vez que hai un problema, sen achegar nunca solucións reais”. Lembraron que o PP presentou propostas concretas para mellorar o saneamento e a prevención de riadas en 2017 e de novo en 2024, “e foron ignoradas sistematicamente por PSOE e BNG”.
Tamén destacaron que Lugo perdeu a oportunidade de acceder aos fondos do PERTE da auga por non cumprir cos requisitos técnicos esixidos, quedando fóra do plan nacional para mellorar a rede de saneamento e implantar tanques de tormenta. No marco do proxecto “BORAMUS”, segundo os populares, xa se recollía a necesidade de “controlar os vertidos por saturación da rede” para reducir o risco de contaminación.
“O que precisa Lugo é responsabilidade, planificación e accións reais, non anuncios improvisados para tapar anos de inacción”, concluíu Ameijide, lembrando ademais que Miguel Fernández, actual responsable municipal do ciclo da auga, leva no goberno local desde 2015 sen impulsar cambios significativos nesta área.
O PP esixe agora que se actúe con urxencia e que se convoque unha mesa de traballo con expertos e colectivos veciñais para definir un plan realista e eficaz que poña fin a unha situación que consideran “insostible”.