O PP denuncia o mal estado do edificio que a Deputación ten na Praza de España, en Navia de Suarna

Os populares denuncian que a Deputación de Lugo ten un edificio na Praza de España de Navia de Suarna en mal estado de conservación ao que os diferentes goberno socialistas, en coalición co BNG, non foron capaces de dar unha solución nestes case 20 anos.

edificio Deputación Navia Suarna portada
edificio Deputación Navia Suarna portada
18 abr 2024

Os populares denuncian que a Deputación de Lugo ten un edificio na Praza de España de Navia de Suarna en mal estado de conservación ao que os diferentes goberno socialistas, en coalición co BNG, non foron capaces de dar unha solución nestes case 20 anos. Os deputados populares, Antonio Ameijide e Jesús Núñez, comprobaron o estado exterior desta infraestrutura xunto ao voceiro do PP en Navia de Suarna, Raúl Pérez.

“É moi preocupante a imaxe deste edificio, moi danado na súa fachada exterior e xerando unha imaxe moi negativa no casco histórico da vila”, sinalou Pérez. Alerta que a aparencia deste edificio amosa que “en calquera momento” se pode producir un desprendemento que provoque un accidente grave xa que se atopa nun dos puntos máis concorridos do municipio.

Ameijide pon de manifesto “a nula preocupación de José Tomé e dos seus socios do BNG pola seguridade” neste municipio xa que o estado deste edificio empeorou co paso dos anos sen que fixesen nada por remedialo. “A realidade é que cando se comprou este edificio, cun goberno do PP á fronte, mercouse para garantir a seguridade e así ampliar a praza, mentres os gobernos de coalición de PSOE e BNG nada fixeron por acadar este fin poñendo en risco a seguridade de todos os veciños de Navia”, sinalou.

Neste senso, Ameijide pon como contrapunto o Castelo de Doiras que a Deputación vén de adquirir por case un millón de euros. “Mentres este edificio está caendo e xa vimos outros exemplos de edificios que abandonaron na provincia, como a Casa da Botica de Guitiriz, un edificio que finalmente houbo que derrubar por seguridade despois de que se viñese abaixo un dos seus muros”.