O PP leva ao Congreso a paralización das obras nos pasos a nivel de Lugo, entre eles o de Recimil
O Partido Popular trasladou ao Congreso a falta de progresos nas actuacións comprometidas para suprimir varios pasos a nivel no municipio de Lugo, entre eles o de Recimil. A pasada semana, deputados do Grupo Popular rexistraron unha pregunta dirixida ao Ministerio de Transportes y Movilidad Sostenible co obxectivo de coñecer se as obras anunciadas xa deran comezo.
Segundo sinalan, a día de hoxe non existen avances nin actuacións visibles sobre o terreo, algo que, aseguran, puideron comprobar persoalmente. Un dos puntos que xera maior preocupación é o paso a nivel de Recimil, onde en novembro de 2023 faleceron dous mozos nun accidente que puxo de manifesto a necesidade urxente de intervir e que causou unha forte conmoción entre a veciñanza. A pesar da gravidade do sucedido e dos compromisos públicos adquiridos, a situación neste enclave continúa sen cambios e sen que se iniciaran os traballos previstos.
Cómpre lembrar que en 2024 Adif puxo en marcha o expediente para eliminar seis pasos a nivel na cidade, nun proceso de contratación que se prolongou durante un ano. Ademais, transcorreron xa máis de tres meses desde a adxudicación das obras sen que se rexistraran avances efectivos na súa execución.
Os residentes da contorna confirman, segundo o PP, que nin sequera se produciron contactos para tramitar as expropiacións necesarias, un requisito imprescindible para desenvolver o proxecto. Esta circunstancia, advirten, fai practicamente imposible cumprir o prazo de oito meses anunciado para completar as actuacións, o que ao seu xuízo evidencia unha nova falta de planificación e de compromiso por parte do Goberno central.
Ante este escenario, o Grupo Popular presentou unha batería de preguntas na Mesa do Congreso para reclamar explicacións e esixir un calendario de execución rigoroso e crible. A deputada Cristina Abades subliñou que a seguridade non pode quedar supeditada a anuncios que non se materializan e defendeu que a cidadanía lucense merece feitos concretos e o cumprimento dos compromisos adquiridos en tempo e forma.