O PP traslada aos empresarios do Ceao-As Gándaras as súas propostas para reducir a burocracia e baixar impostos
Os candidatos do Partido Popular ao Congreso e ao Senado pola provincia de Lugo mantiveron unha reunión con representantes da Asociación de Empresarios do Polígono O Ceao-As Gándaras para coñecer as necesidades do tecido empresarial e presentar as súas propostas para favorecer o desenvolvemento económico. No encontro participaron Francisco Conde, José Manuel Barreiro, Cristina Abades, Juan Serrano e Ramón Carballo.
Durante a xuntanza, os populares identificaron como principais preocupacións do sector o exceso de burocracia, o incremento dos custos enerxéticos, a presión fiscal e o absentismo laboral. Ante esta situación, defenderon a necesidade de introducir cambios no ámbito empresarial mediante a simplificación dos trámites administrativos, a redución de impostos e medidas para reforzar a Seguridade Social.
Entre as propostas concretas figura eliminar tres normas por cada nova que se aprobe, desbloquear o acceso á rede eléctrica nun prazo de 18 meses e introducir cambios na xestión das incapacidades temporais, reforzando tamén o papel das mutuas para axilizar os procedementos.
Francisco Conde asegurou que os empresarios necesitan "as medidas e as condicións para crear emprego" e defendeu o apoio ás persoas que arriscan e traballan. "Cando eles crean emprego, Lugo crece e crece toda a provincia", afirmou.
Reclamacións sobre a planificación eléctrica
O número un da candidatura popular ao Congreso tamén criticou a planificación eléctrica do Goberno central para o horizonte 2030, ao considerar que deixa discriminada a provincia de Lugo. En concreto, sinalou que non contempla a zona centro-oeste da provincia nin o reforzo necesario para evacuar a enerxía dos proxectos renovables na subestación de Ludrio.
Conde incidiu na importancia de garantir unha rede eléctrica de calidade e sostible, con capacidade suficiente nas zonas de interese industrial, para facilitar o desenvolvemento empresarial e a creación de novas oportunidades económicas.
O PP aborda coa veciñanza a ocupación ilegal de vivendas
Francisco Conde e José Manuel Barreiro tamén mantiveron unha reunión con representantes de colectivos veciñais de Lugo para abordar o fenómeno da ocupación ilegal de vivendas e trasladar as propostas do programa electoral de Alberto Núñez Feijóo. Barreiro lembrou que o Senado aprobou en febreiro de 2024, a proposta do PP, unha lei para facilitar o desaloxo exprés, impedir o empadroamento nas vivendas ocupadas ilegalmente e ofrecer maior seguridade xurídica aos propietarios e aos alugueiros, pero que a iniciativa foi bloqueada pola Mesa do Congreso.
O candidato ao Senado tamén recordou a aprobación dunha modificación do Código Penal para que o corte das subministracións dunha vivenda ocupada non sexa considerado delito de coacción, unha proposta que tampouco chegou a debaterse no Congreso. Ambas as iniciativas contaron co voto en contra do PSOE e do BNG. Entre as medidas que defende agora o PP figuran unha lei que permita recuperar a vivenda en 48 horas desde o primeiro día, a reforma da Lei de Propiedade Horizontal para que as comunidades de propietarios poidan solicitar o desaloxo xudicial e que os propietarios non teñan que asumir os gastos de auga, luz, gas nin os impostos do inmoble mentres dure a ocupación. Tamén propoñen declarar nulo o empadroamento das persoas que ocupen ilegalmente unha vivenda.