Concello

A alcaldesa de Lugo reuniuse con AFALU para coñecer os avances da iniciativa, que prevé habilitar este recurso na terceira planta do antigo Hospital de Calde

A alcaldesa de Lugo, Elena Candia, mantivo unha reunión de traballo co presidente da Asociación de Familiares de Enfermos de Alzheimer de Lugo (AFALU), Valentín Calvín Fondevila, para analizar o estado do proxecto do futuro centro de respiro destinado ao apoio das persoas con alzhéimer e das súas familias, previsto no antigo Hospital de Calde.

Durante o encontro, a responsable municipal trasladou ao presidente de AFALU o compromiso expresado pola Xunta de Galicia de continuar dando pasos para facer realidade este servizo, que considera estratéxico para reforzar a atención ás persoas afectadas por esta enfermidade e ao seu contorno.

Na reunión, AFALU presentou o anteproxecto técnico da actuación, un documento que permitirá avanzar na definición deste novo recurso asistencial, considerado prioritario para atender as necesidades das persoas con alzhéimer e outras demencias, así como das súas familias.

A proposta contempla a rehabilitación da terceira planta do antigo Hospital de Calde para crear un centro de respiro especializado. O futuro equipamento incluiría habitacións individuais, espazos de convivencia, áreas de rehabilitación, enfermaría, comedor e outros servizos adaptados ás necesidades asistenciais das persoas usuarias.

A alcaldesa destacou a importancia desta actuación para reforzar a rede de recursos sociosanitarios da cidade e apoiar ás persoas coidadoras. “Desde o primeiro momento tivemos claro que Lugo necesitaba un recurso destas características. Hoxe damos un novo paso cun anteproxecto que achega este obxectivo e que permitirá seguir avanzando para facer realidade un servizo moi necesario para as persoas con alzhéimer e as súas familias.”

Elena Candia reiterou tamén a disposición do Goberno municipal para seguir colaborando con AFALU e co resto das administracións implicadas no desenvolvemento deste proxecto, co obxectivo de dotar a Lugo dun centro especializado que sirva de apoio ás persoas con alzhéimer e ás súas familias.