Política

O grupo socialista denuncia demoras de ata dous anos en pagos e reclama máis transparencia e mellor xestión ao goberno local

O Grupo Municipal de PSdeG en Baralla expresou a súa fonda preocupación pola situación económica do Concello e advertiu de que os atrasos na devolución de cartos á veciñanza, a madeireiros e a empresas apuntan a un posible problema de liquidez que, ao seu xuízo, o goberno local do Partido Popular tenta minimizar con explicacións administrativas.

O voceiro socialista, Jaime González del Río, trasladou esta situación no último pleno ordinario, no que puxo o foco nas demoras existentes na devolución de avais depositados por madeireiros para responder a posibles danos nos camiños municipais durante os traballos de corta e transporte de madeira.

Segundo o PSdeG, a xustificación ofrecida polo alcalde non resolve unha realidade que afecta a persoas e empresas que levan ata dous anos agardando pola devolución do seu diñeiro. O voceiro sostivo que non se trata de incidencias puntuais, senón dun problema recorrente que, na súa opinión, evidencia unha mala xestión económica.

O grupo socialista tamén se referiu ás devolucións vinculadas ás bonificacións de licenzas en obras de vivendas antigas, asegurando que veciños e veciñas trasladaron ao grupo municipal atrasos prolongados durante meses e mesmo anos, malia as promesas de solución por parte do goberno local. Isto, engaden, xera unha crecente desconfianza na administración municipal.

Ademais da situación financeira, o PSdeG denunciou o estado de distintos espazos públicos e a falta de limpeza no municipio, asegurando que as queixas veciñais son cada vez máis frecuentes malia que o goberno local nega a súa existencia. Tamén criticaron problemas na recollida de residuos e unha sensación xeneralizada de abandono.

A formación socialista sumou a esta situación a imaxe xerada pola presenza de troitas mortas nunha presa situada xunto ao río, un feito que consideran indicativo do deterioro ambiental e da falta de coidado por parte do executivo local.

Finalmente, o voceiro referiuse aos episodios de turbidez na auga de consumo, cuestionando a explicación do alcalde que vincula o problema á actuación dun madeireiro. O PSdeG considera que o Concello debe garantir información clara e un servizo seguro á veciñanza, sen limitarse a derivar responsabilidades.

O grupo socialista de Baralla reclamou máis transparencia, axilidade nas devolucións pendentes e unha mellora xeral dos servizos públicos, advertindo de que o municipio precisa xestión eficaz e solucións fronte ao que describen como unha acumulación de atrasos e falta de resposta institucional.