O PSdeG volverá levar ao Pleno a proposta para nomear a Mariano Castiñeira como Fillo Adoptivo de Lugo
O Grupo Municipal Socialista do Concello de Lugo volverá defender no próximo Pleno da Corporación a proposta para nomear a Mariano Castiñeira Fillo Adoptivo da cidade.
Así o anunciou o portavoz municipal socialista, Miguel Fernández, despois do que cualificou como un “preocupante precedente democrático” ocorrido na sesión plenaria da pasada semana, na que o Goberno local encabezado por Elena Candia impediu, segundo denuncia o PSdeG, que a iniciativa puidese ser debatida e votada.
A proposta, impulsada polo propio Miguel Fernández, pretende que a Corporación municipal aprobe por unanimidade este recoñecemento institucional ao doutor Mariano Castiñeira, figura estreitamente ligada ao deporte lucense e ao tecido social da cidade. Os socialistas destacan a súa traxectoria marcada polo compromiso cívico, a promoción dos valores deportivos e o seu labor continuado a prol de Lugo.
Desde o PSdeG consideran “moi grave” a decisión da alcaldesa de impedir o debate da iniciativa e sosteñen que se produciu unha “terxiversación interesada da normativa municipal” co obxectivo de evitar que os grupos municipais se pronunciasen sobre unha proposta que, segundo indican, contaba cun amplo respaldo social e político.
Miguel Fernández lamentou que Elena Candia “utilizase a Presidencia do Pleno para bloquear artificialmente un debate lexítimo e impedir que os representantes públicos puidesen expresar democraticamente a súa posición”. O portavoz socialista advertiu ademais de que o sucedido “non ten precedentes recentes na vida institucional lucense” e representa “unha anomalía democrática impropia dun Concello como o de Lugo”.
“Candia retorceu a normativa para impedir que se debatise unha proposta limpa, construtiva e pensada desde o consenso. O que fixo o pasado xoves foi utilizar mecanismos procedimentais para silenciar unha iniciativa que buscaba unir á Corporación arredor dunha figura exemplar para Lugo”, afirmou Fernández.
O portavoz confirmou tamén que será el mesmo quen volverá presentar e defender a iniciativa no próximo Pleno municipal. “Lugo ten unha débeda moral con Mariano Castiñeira e ningunha manobra poderá impedir que este recoñecemento chegue”, asegurou. Fernández reivindicou ademais o impulso persoal da proposta ao considerar que formaba parte do traballo desenvolvido durante a súa etapa á fronte da Alcaldía antes da moción de censura.
“Estamos falando dunha persoa que representa como poucas os valores do compromiso coa cidade, co deporte e coa sociedade lucense. Lugo non pode mirar cara outro lado nin permitir que intereses políticos bloqueen un recoñecemento merecido e xusto”, concluíu o portavoz socialista.
UN INFORME XURÍDICO QUE NON EXISTE
A portavoz adxunta do Grupo Municipal Socialista, Ana González Abelleira, denunciou que o suposto informe xurídico utilizado pola alcaldesa Elena Candia para impedir que o Pleno municipal debatese e votase a proposta socialista para nomear a Mariano Castiñeira Fillo Adoptivo de Lugo “non existe”, despois de que o Concello non remitise ningún documento que acreditase a súa existencia malia a solicitude formal presentada polo PSOE.
Abelleira lembrou que durante a sesión plenaria ordinaria do pasado 28 de maio, Candia decidiu retirar da orde do día a proposición rexistrada polo Grupo Socialista para o recoñecemento institucional de Mariano Castiñeira, argumentando que existía un informe da Secretaría Xeral do Pleno que impedía a súa tramitación.
Ante esta situación, o propio día da sesión plenaria o Grupo Municipal Socialista presentou un escrito rexistrado dirixido á Alcaldía solicitando copia do informe xurídico no que, segundo afirmara a alcaldesa, se fundamentaba a decisión de impedir o debate da iniciativa. No documento reclamábase expresamente o informe emitido pola Secretaría Xeral do Pleno que supostamente xustificaba a imposibilidade de someter a votación a proposta socialista.
“Transcorrido o prazo correspondente, ese informe non apareceu. Non foi remitido ao noso grupo porque simplemente non existe. A conclusión é tan grave como evidente: Elena Candia utilizou un informe inexistente para impedir que o Pleno puidese pronunciarse sobre unha proposta que contaba cun amplo respaldo social e que estaba destinada a recoñecer a unha figura fundamental para o deporte lucense”, afirmou a portavoz socialista.
Para González Abelleira, a actuación da alcaldesa responde exclusivamente a unha estratexia política destinada a impedir que unha iniciativa promovida polo Grupo Socialista puidese prosperar. “Non estamos diante dun erro administrativo nin dunha cuestión técnica. Estamos ante unha decisión deliberada para bloquear unha proposta da oposición por puro interese partidista. Candia preferiu utilizar a súa posición institucional para impedir un debate democrático antes que asumir o resultado dunha votación”, denunciou.
A edil considera especialmente preocupante que se empregasen argumentos xurídicos sen soporte documental para limitar os dereitos dos grupos políticos municipais. “Se unha alcaldesa pode retirar unha iniciativa do Pleno alegando informes que despois non existen, estamos ante un precedente gravísimo para a calidade democrática do Concello de Lugo. Non se pode gobernar manipulando os procedementos nin utilizando as institucións como ferramentas ao servizo dun partido político”, advertiu.
Abelleira sostén que esta actuación encaixa nunha forma de gobernar que xa se está facendo habitual desde a chegada do novo Executivo municipal tras a moción de censura. “Primeiro intentan silenciar as iniciativas da oposición, despois impiden os debates e finalmente escóndense detrás de supostos informes que ninguén é capaz de atopar. É unha maneira profundamente autoritaria de entender a política municipal”, sinalou.
A portavoz socialista lembrou ademais que a proposta para o nomeamento de Mariano Castiñeira respondía a unha demanda amplamente compartida pola sociedade lucense, polo seu papel fundamental na promoción do deporte e na formación de varias xeracións de mozos e mozas da cidade. “O que Candia bloqueou non foi unha proposta do PSOE; o que intentou bloquear foi o recoñecemento que merece unha persoa que dedicou boa parte da súa vida a engrandecer Lugo”, afirmou.
Por último, González Abelleira advertiu de que o Grupo Socialista continuará reclamando explicacións e esixindo responsabilidades políticas por estes feitos. “A cidadanía debe coñecer o que ocorreu. Estamos ante unha actuación incompatible coa transparencia, co respecto ao funcionamento democrático do Pleno e cos dereitos da oposición. Lugo merece unha Alcaldía que respecte as regras do xogo democrático e non unha alcaldesa que utilice o seu cargo para impedir debates incómodos. Esta forma de actuar debe ser rexeitada e sancionada democraticamente pola cidadanía”, concluíu.