O PSOE de Lugo reclama a Candia que active o Plan Municipal de Vivenda e aplique as medidas previstas
O portavoz do Grupo Municipal Socialista de Lugo, Miguel Fernández, acompañado polo concelleiro Jorge Bustos, reclamou ao goberno local de Elena Candia que poña en marcha de inmediato o Plan Municipal de Vivenda elaborado durante o anterior mandato socialista. A formación considera prioritario desenvolver as medidas recollidas no documento para aumentar a oferta de inmobles dispoñibles, facilitar o acceso ao alugueiro e incrementar o parque de vivenda protexida.
Fernández sostén que o acceso á vivenda é unha das principais preocupacións da cidadanía e un dos obstáculos aos que se enfrontan as persoas que queren emanciparse, formar unha familia ou permanecer no seu barrio. Segundo os datos que achega o PSOE, Lugo conta con máis de 2.000 persoas demandantes de vivenda inscritas nos rexistros autonómicos e 10.732 inmobles baleiros.
"Non podemos resignarnos a que vivir en Lugo se converta nun luxo ou a que a xente nova teña que marchar porque non atopa unha vivenda que poida pagar", afirmou o portavoz socialista, que defende a necesidade de aproveitar os recursos existentes e establecer unha planificación que permita responder á demanda residencial.
O PROXECTO
O plan municipal contempla diferentes vías de actuación e non se limita á construción de novos inmobles. Entre as prioridades figuran a mobilización das vivendas baleiras, a rehabilitación de propiedades que non se atopan en condicións de uso, o aumento da vivenda protexida e a regulación das vivendas de uso turístico cando poidan afectar á dispoñibilidade residencial.
Unha das principais propostas é crear unha Bolsa Municipal de Alugueiro Accesible que conecte os propietarios que non ofrecen os seus inmobles no mercado por falta de garantías coas persoas que buscan unha vivenda a un prezo asumible. O Concello asumiría funcións de intermediación, acompañamento e xestión, ademais de establecer mecanismos de protección fronte a posibles incidencias, segundo as condicións que se definan no programa.
Fernández defende que esta ferramenta debe ofrecer seguridade ás dúas partes. "Non se trata de enfrontar propietarios e inquilinos, senón de conectar as necesidades de uns e doutros para que haxa máis vivendas dispoñibles", explicou.
Pola súa banda, Jorge Bustos incidiu na importancia de complementar a bolsa con incentivos para a rehabilitación, bonificacións fiscais destinadas aos propietarios que incorporen os seus inmobles ao alugueiro accesible e medidas para recuperar o parque residencial existente. O plan tamén propón utilizar a fiscalidade, dentro dos límites legais, para favorecer a posta en uso das vivendas desocupadas inxustificadamente.
O concelleiro lembrou que o documento contempla axudas para mellorar a accesibilidade e a eficiencia enerxética dos edificios, así como actuacións para recuperar inmobles que poidan volver destinarse a residencia habitual. "Lugo non pode permitirse ter miles de inmobles baleiros mentres hai persoas que non atopan unha vivenda", sinalou.
Bustos tamén acusou o goberno de Candia de non dar continuidade ás iniciativas impulsadas durante o anterior mandato. O edil cualificou de "engano á cidadanía" a postura do executivo local e asegurou que non está a ter en conta medidas que, segundo os socialistas, xa estaban avanzadas antes da moción de censura.
Entre elas citou a aprobación da Ordenanza de Rehabilitación, en decembro de 2025; a proposta de rebaixa do IBI, asinada en febreiro de 2026, e as bases para a bolsa de alugueiro, asinadas polo director xeral de Urbanismo e polo propio concelleiro o 31 de marzo, tres semanas antes da presentación da moción de censura.
O PSOE tamén reclama que o solo municipal adecuado se destine á promoción de vivenda protexida, en colaboración coas administracións competentes e mediante os instrumentos previstos legalmente. Os socialistas consideran que esta planificación debe atender tanto as necesidades actuais como as futuras e permitir que as persoas con diferentes capacidades económicas poidan residir na cidade.
Fernández pediu finalmente ao goberno municipal que concrete os pasos que prevé dar para executar o plan e estableza prioridades, prazos e obxectivos avaliables. "O que non podemos permitir é que quede paralizado un plan que ofrece unha folla de ruta para mobilizar vivendas, facilitar alugueiros e planificar novas promocións", advertiu.
O portavoz socialista concluíu reclamando que o executivo local pase dos anuncios á aplicación efectiva das medidas e aposte por aumentar a oferta de alugueiro accesible, reducir o número de vivendas baleiras e ampliar o parque de vivenda protexida.